Hindistonning Uttar-Pradesh shtati hukumati o‘tgan hafta hukmron partiya vakillarining Muhammad payg‘ambar (s.a.v.)ga qaratilgan haqoratli iboralari oqibatida kelib chiqqan tartibsizliklarga aloqadorlikda ayblanayotgan bir necha kishining uylarini buzib tashladi, deb xabar bermoqda Reuters.
Kashmir mintaqasida esa ushbu iboralarning bir qanchasini bayon qilgan hukmron partiya sobiq matbuot kotibini boshidan judo qilish tahdidi bo‘lgan videoni e’lon qilgan o‘smir hibsga olindi.
Bir qator tumanlarda musulmonlar va hinduiylar o‘rtasida, ba’zi joylarda esa namoyishchilar va politsiya o‘rtasida to‘qnashuvlar bo‘lib o‘tdi. Uttar-Pradesh shtatida norozilik aksiyalari boshlanganidan buyon 300 kishi qo‘lga olingan.
Bunday aksiyalar Hindistonning boshqa shtatlarida ham bo‘lib o‘tdi. Chunonchi, Jarkxand shtatida politsiya nozorilik aksiyalarini tarqatib yuborish uchun havoga o‘q uzdi: ikki kishi halok bo‘ldi.
Hindistondagi musulmon ozchilik vakillarining ba’zilari haqoratli mulohazalarni hukmron partiyaning diniy e’tiqoddan tortib hijob taqishgacha bo‘lgan turli masalalar bo‘yicha bosim va kamsitishlarga misol sifatida ko‘rmoqda.
Dam olish kunlari Uttar-Pradesh shtati bosh vaziri Yogi Adityanatx tartibsizliklarga aloqadorlikda ayblanayotgan odamlarning har qanday noqonuniy muassasalari va uylarini buzishni buyurdi.
Musulmonlar orasidagi noroziliklar va tartibsizliklar “Bxaratiya Janata parti” hukmron partiyasining ikki vakili Nupur Sharma va Navin Kumar Jindal telemunozaralar chog‘ida Muhammad payg‘ambar (s.a.v.) haqida haqoratli fikrlar bildirganidan keyin boshlandi.
Tartibsizliklar fonida Sharma zudlik bilan lavozimidan chetlatildi va partiyadan chiqarildi. Politsiya Sharmaga nisbatan dinlararo dushmanlikni avj oldirish bilan bog‘liq moddalar bo‘yicha jinoyat ishi ochdi. Ayni vaqtda u kelib tushayotgan tahdidlardan himoya bilan ta’minlandi. Jindal ham partiyadan chiqarildi.
Oxir-oqibat Sharma Twitter orqali musulmonlardan uzr so‘radi va hech kimning his-tuyg‘ulariga tegish niyatida bo‘lmaganini qayd etdi.
Hindiston bosh vaziri Narendra Modi ommaviy tartibsizliklar yuzasidan izoh berganicha yo‘q.
Izoh (0)