Qirg‘iziston Milliy xavfsizlik davlat qo‘mitasi xodimlari O‘zbekiston bilan chegarada yana bir yashirin tunnelni aniqlandi. Bu haqda qo‘mitaga tayanib, Kaktus-media xabar qildi.
Qayd etilishicha, tunnel Qorasuv tumanidagi uylardan birida joylashgan. 13 metr chuqurlikda joylashgan tunneldan 2x1,7 metr o‘lchamdagi yo‘lak orqali o‘tiladi. Umumiy masofasi — 177 metr.
Yerosti tunneli egasi Qirg‘iziston fuqarosi M.I.M. o‘tgan yilning sentabr oyida R. ismli shaxs bilan ikki davlat o‘rtasida tunnel qazish bo‘yicha kelishib olgan. Tunnel orqali Qirg‘izistondan O‘zbekistonga valyuta va tovarlar olib o‘tish rejalashtirilgan.
M.I.M. o‘z aybini inkor etmagan va huquqni muhofaza qiluvchi organlar bilan hamkorlik qilishga tayyorligini bildirgan. Hozirda tergov davom etmoqda.
May oyida ham Qorasuv tumanida Qirg‘iziston va O‘zbekistonni yerosti yo‘li orqali bog‘lab turuvchi tunnel topilgandi. Ushbu tunnel aniqlangan hudud egasi Jalolobod tumanining “Qiziljar” posyolkasidagi ruhiy kasalliklar shifoxonasida davolanayotgani sabab unga nisbatan qayta tibbiy tekshiruv o‘tkazish rejalashtirilgan.
Shuningdek, 7-iyun kuni ham Qirg‘iziston xavfsizlik kuchlari tomonidan O‘zbekiston bilan chegarada 155 metrlik yerosti tunneli aniqlangan.
Izoh (0)