Қирғизистон Миллий хавфсизлик давлат қўмитаси ходимлари Ўзбекистон билан чегарада яна бир яширин туннелни аниқланди. Бу ҳақда қўмитага таяниб, Кактус-медиа хабар қилди.
Қайд этилишича, туннел Қорасув туманидаги уйлардан бирида жойлашган. 13 метр чуқурликда жойлашган туннелдан 2х1,7 метр ўлчамдаги йўлак орқали ўтилади. Умумий масофаси — 177 метр.
Ерости туннели эгаси Қирғизистон фуқароси М.I.М. ўтган йилнинг сентябрь ойида Р. исмли шахс билан икки давлат ўртасида туннел қазиш бўйича келишиб олган. Туннел орқали Қирғизистондан Ўзбекистонга валюта ва товарлар олиб ўтиш режалаштирилган.
М.I.М. ўз айбини инкор этмаган ва ҳуқуқни муҳофаза қилувчи органлар билан ҳамкорлик қилишга тайёрлигини билдирган. Ҳозирда тергов давом этмоқда.
Май ойида ҳам Қорасув туманида Қирғизистон ва Ўзбекистонни ерости йўли орқали боғлаб турувчи туннел топилганди. Ушбу туннел аниқланган ҳудуд эгаси Жалолобод туманининг «Қизилжар» посёлкасидаги руҳий касалликлар шифохонасида даволанаётгани сабаб унга нисбатан қайта тиббий текширув ўтказиш режалаштирилган.
Шунингдек, 7 июнь куни ҳам Қирғизистон хавфсизлик кучлари томонидан Ўзбекистон билан чегарада 155 метрлик ерости туннели аниқланган.
Изоҳ (0)