Eksportchilarni kutish emas, balki o‘zimiz ularning yoniga borib, gaplashib, muammo bo‘lsa, yechim topishimiz kerak — Respublika Sanitariya-epidemiologiya xizmati

Shavkat Mirziyoyev raisligida o‘tkazilgan standartlashtirish sohasida amalga oshirilayotgan ishlar samaradorligini oshirish yuzasidan yig‘ilish tanqidiy ruhda o‘tgan. Bu haqda yig‘ilishdan so‘ng Respublika Sanitariya-epidemiologiya xizmati boshlig‘i Bahodir Yusupaliyev jurnalistlarga bergan intervyusida aytib o‘tdi, deb xabar bermoqda “Daryo” muxbiri.

Uning aytishicha, bir qator vazirlik va idoralar eksportni ko‘paytirish, jahon bozorlariga chiqish masalalarida javobgar hamda ruxsatnomalar beradi. Shu jumladan, bu veterinariya xizmati, sanitariya epidemiologiya xizmati, texnik jihatdan tartibga solish agentligi hamda o‘simliklar karantini agentligi ham.

Mana shu 4 idora o‘zaro ishlarni muvofiqlashtirib, ruxsatnomalar berish, eksportchilarni qo‘llab-quvvatlash masalasi juda chuqur muhokama qilindi. Prezidentimiz tomonidan berilgan topshiriqlarni tahlil qilib, bir qancha xulosalar chiqardim. Birinchi navbatda biz barcha imkoniyatlarimizni eksportchilarni qo‘llab-quvvatlashga qaratishimiz zarur.

Ularni kutish emas, balki o‘zimiz ularning yoniga borib, gaplashib, eksportda nima muammo bo‘lsa, ularning yechimini topib berishimiz kerak. Bu asosiy g‘oya. Buni amalga oshirish uchun esa tizimli ishni tashkil qilishimiz, ya’ni har bir viloyat, tumanda aynan eksportga mas’ul xodimlarni biriktirish orqali ularning birgalikdagi uzviy ish olib borishini ta’minlash.

Keyingi galda bizda mavjud sanitariya normalarini jahon talablariga moslashtirishimiz kerak. Biz bu jarayonni boshladik, bugungi kunda mana shunday 22 ta qoida hamda me’yorlar ishlab chiqilib tasdiqlandi. Yil oxirigacha yana 28 ta qoida va me’yorlarni ishlab chiqib, tasdiqlashni reja qilib oldik. Bundan tashqari oziq-ovqat xavfsizligi to‘g‘risida qonunimiz bor, lekin u bugungi kunda talabga javob bermaydi, uni qayta ishlab Oliy Majlisga kiritishimiz kerak bo‘ladi.

Shuningdek, oziq-ovqat xavfsizligi to‘g‘risida reglament ham bor. Uni ham albatta qayta ko‘rib chiqib, jahon talablariga moslashtirishimiz kerak. Bu degani Jahon savdo tashkiloti, Codex Alimentariusga moslashtirishimiz kerak. Keyingi galda mavjud oziq-ovqat xavfsizligi laboratoriyalarimizning salohiyatini oshirishimiz kerak. Prezidentimiz bergan topshiriqlar asosida bu yil 4 ta, 2023-yilda esa ana shunday laboratoriyani xalqaro akkreditatsiyadan o‘tkazamiz. Bugun bunday laboratoriya respublikada 1 ta va u oziq-ovqat xavfsizligi tahlilini o‘tkazish uchun tan olingan.

Prezidentimiz e’tibor qaratgan yana bir masala, bu aynan shu sohada kadrlarni tayyorlash va salohiyatini oshirishdan iborat. Bugungi kunda biz Germaniya, Fransiya va AQSHning ayni yo‘nalishdagi kompaniyalari bilan hamkorlik qilgan holda xodimlarimizning malakasini oshirib boryapmiz.

Yana bir muhim masala, kadrlarning salohiyatini o‘zimizda oshirish, ya’ni sanitariya epidemiologiya sohasi bo‘yicha zamonaviy imkoniyatlarga ega o‘quv markazi tashkil etish taklifi berildi.

Ushbu yig‘ilishda chiqarilgan asosiy fikr ham ana shu 4 tashkilotning birgalikda ishlab, eksport korxonalarini qo‘llab-quvvatlash, borib muammolarini o‘rganish, GSP+ davlatlarini inobatga olgan holda davlatning eksport salohiyatini ko‘tarish, eksport hajmini ko‘tarishdan iborat.