Buxoroda fuqaroni ishga joylashtirish evaziga pora olgan viloyat ko‘p tarmoqli tibbiyot markazi hamshirasi qo‘lga olindi. Bu haqda “Daryo”ga Milliy gvardiyaning viloyat boshqarmasi axborot xizmati rahbari Murodjon Rahmatullayev ma’lum qildi.
Ta’kidlanishicha, fuqaro Milliy gvardiyaning viloyat boshqarmasiga ishga kirishi evaziga undan yirik miqdorda pora talab qilinayotganini aytgan. Ariza yuzasidan Bosh prokuratura huzuridagi departamentning viloyat boshqarmasi Romitan tuman bo‘limi hamkorligida tadbir o‘tkazilgan.Viloyat ko‘p tarmoqli tibbiyot markazi kichik tibbiy hamshirasi 41 yoshli G.J. fuqaro G.A.ni aldab, Buxoro shahar tez tibbiy yordam bo‘limiga ishga joylashtirishi evaziga undan 1700 dollar talab qilgan. G.A. buncha miqdorda pul berishga sharoiti yetmasligini tushuntirishiga qaramay, hamshira talabini qo‘yishda davom etgan. Huquq-tartibot idoralari tomonidan uyushtirilgan tadbirda hamshira avtobekat oldida kimyoviy ishlov berilgan 1700 dollarni olgan vaqtida ushlangan.
Mazkur holat yuzasidan departamentning Romitan tuman bo‘limi tomonidan G.J.ga nisbatan Jinoyat kodeksining 168-moddasi (firibgarlik) 1-qismi bilan jinoyat ishi qo‘zg‘atilgan.
Izoh (0)