Rossiya—Ukraina urushi tufayli ta’minot zanjiri uzilishi, transport xarajatlarining oshishi va ayrim mamlakatlarda eksportning taqiqlanishi sabab g‘alla va boshqa mahsulotlar narxi keskin ko‘tarilganidan so‘ng, xalqaro ekspertlar guruch narxi ham oshishidan ogohlantirmoqda.
CNBC telekanali BMTning oziq-ovqat va qishloq xo‘jaligi tovarlari indeksiga tayanib, guruch narxi bir necha oy ketma-ket o‘sib borayotgani va 12 oy ichida eng yuqori cho‘qqiga chiqqanini yozmoqda.
Dunyoda guruchning asosiy yetishtiruvchilari Xitoy va Hindiston bo‘lib, ularning jahon miqyosidagi ulushi jami yetishtiriladigan guruchning yarmidan ko‘pini tashkil qiladi. Mutaxassislar Hindiston hukumatining bug‘doy ortidan guruch mahsulotlari eksportini ham cheklay boshlashidan xavotirda. Ayni paytda, Tailand va Vyetnam, yana ikki yirik ishlab chiqaruvchilar guruch narxini oshirish haqidagi kelishuvlar bo‘yicha muzokaralarni boshlagan.
Hozirda jahon talabini qondirish uchun yetarli miqdorda guruch yetishtirilmoqda, biroq narxlarning oshishi ko‘plab mamlakatlarning oziq-ovqat xavfsizligiga tahdid solmoqda.
Izoh (0)