XTV o‘qituvchilarga attestatsiyadan o‘tish, toifa va ustama olishda yordam bo‘luvchi sertifikatlar yo‘qligidan ogohlantirdi

O‘zbekiston Xalq ta’limi vazirligi pedagoglarga murojaat bilan chiqib, ularni turli jurnallarda maqola chop etish attestatsiyadan o‘tishga yordam berishi haqidagi xabarlarga ishonmaslikka chaqirdi.

Bildirishicha, so‘nggi kunlarda ayrim Telegram kanallar, jumladan, “Mahoratli pedagog” kanali va jurnali Xalq ta’limi vazirligi bilan hamkorlikda faoliyat yuritishi borasida haqiqatga zid bo‘lgan ma’lumotlarni bergan holda, o‘z jurnalida pulli asosda maqolalar chiqarish hamda pulli seminarlarga qatnashish xizmatlarini targ‘ib qilmoqda.

Buning evaziga esa sertifikat egalariga navbatdagi attestatsiyadan o‘tish, toifa va ustama olishda yordam bo‘lishi iddao qilinmoqda.

Shu munosabat bilan XTV “Mahoratli pedagog” Telegram-kanali va jurnali bilan hech qanday aloqasi yo‘qligini, ushbu kanal orqali beriladigan sertifikat esa hech qanday imtiyozlarga ega emasligini va vazirlik pedagoglarga bu kabi pulli xizmatlar ko‘rsatmasligini ma’lum qildi.

“Vazirlik faoliyatiga doir barcha rasmiy ma’lumotlar faqat vazirlikning rasmiy kanallari orqali berib boriladi. Ogoh bo‘ling, aldanib qolmang”, — deyiladi XTV murojaatida.

Ma’lumot uchun, “2022–2026-yillarda xalq ta’limini rivojlantirish bo‘yicha milliy dasturni tasdiqlash to‘g‘risida“gi prezident farmoniga ko‘ra, DTMning milliy baholash tizimida olingan sertifikatga ega bo‘lgan pedagog kadrlarga ularning tarif stavkasiga nisbatan 20 foiz miqdorida (chet tili bo‘yicha sertifikatlar bundan mustasno) har oylik ustama to‘lanadi. 2025-yil 1-yanvarga qadar ularning tarif stavkasiga nisbatan 50 foiz miqdorida, 2025-yil 1-yanvardan boshlab ularning tarif stavkasiga nisbatan 20 foiz miqdorida to‘lanadi.