Namangan viloyati hokimi bu haqda talaba va magistlarning startap loyihalari taqdimoti davomida aytib o‘tdi, deya xabar beradi “Daryo” muxbiri Azizbek Abduvaliyev.
Tadbir viloyat hokimining talaba-yoshlar bilan o‘tgan galgi muloqotidan so‘ng moliyalashtirishga tavsiya etilgan loyiha egalariga sertifikatlar topshirilishi bilan boshlandi.
Talabalardan biri ko‘chalarni yoritishda energiya tejash imkonini beruvchi loyihani amalga oshirish uchun 60 million so‘m, biri fizika fani ommalashtirishga mo‘ljallangan jihozlar komplekti uchun 54 million so‘m, yana biri esa smart-globus loyihasi uchun 30 million so‘mlik sertifikat bilan taqdirlandi.
Bu galgi taqdimotda muqobil energiya vositalariga oid loyihalar yetakchilik qildi. Talabalar xonadon va korxona-tashkilotlarni yoritish hamda isitishga mo‘ljallangan startaplarni taqdim etdi. Viloyat hokimi mazkur loyihalarning barchasi ko‘rib chiqish va amaliyotga joriy etishga loyiq ekanini ta’kidlab, buning uchun ochiq tanlov o‘tkazishni taklif etdi.
Shuningdek, olxo‘ri danagidan yog‘ olish va aqlli chiqindi qutisi loyihalari ham ko‘pchilikning e’tiborini tortdi. Talaba qizlardan biri esa Milanda o‘tkaziladigan modalar festivalida ishtirok etishga taklif olganini bildirib, viloyat rahbaridan bu safarni tashkillashtirishda yordam so‘radi.
Muloqot ikki soatdan ortiq davom etayotgan bo‘lsa ham, taklif va murojaatlarning oxiri ko‘rinmasdi. Shavkat Abdurazzaqov buni talabalarning innovatsion ishlari uzoq vaqt e’tibordan chetda qolib ketgani bilan izohladi.
“Bu bizning kamchiligimiz. Aksar holatlarda talabalarning ishlanmalari oliy o‘quv yurti darajasida qolib ketgan. Bugungi taqdimotda ko‘ryapmizki, ularning katta qismi kerak bo‘lsa hoziroq moliyalashtirishga tayyor. Shu uchun viloyatda talabalarning startap loyihalarni qo‘llab-quvvatlaydigan ‘Yosh innovatorlar’ jamg‘armasini tashkil etib, boshlanishiga 1 milliard so‘m mablag‘ ajratamiz. Ustozlar, olimlarimizdan iborat kengash tuzib, loyihalarni saralashni ularga topshirsak. Chunki asli hokim bilan uchrashgandan keyingina masalalar hal etilishi noto‘g‘ri: tizim ishlashi kerak”, — dedi Shavkat Abdurazzaqov.
Izoh (0)