Buxoro shahrida 12-iyun kuni suv quvurdagi nosozlik bartaraf etilib, ichimlik suvi ta’minoti to‘liq tiklandi, deb xabar bermoqda Buxoro viloyati hokimligi.
Kecha, 11-iyun kuni Buxoro shahri Piridastgir ko‘chasidan o‘tuvchi markaziy ichimlik suvi quvurida nosozlik yuzaga kelgani tufayli shahar aholisining ichimlik suvi ta’minoti vaqtincha to‘xtatilgan edi. “Buxoro suv ta’minoti” MCHJ mutaxassislari tomonidan olib borilgan avariya-tiklash ishlari natijasida yaroqsiz holga kelib qolgan shisha tolali hobus diametri 700 millimetr bo‘lgan po‘lat quvurga almashtirildi.
Ta’mirlash ishlari yakunlanib, ayni paytda Buxoro shahrining barcha hududlarida ichimlik suvi ta’minoti to‘liq qayta tiklandi.
Buxoro viloyati hokimligi suv ta’minotidagi uzilish haqida kecha, 11-iyun kuni soat 15:12 da ogohlantirgan bo‘lsa, nosozlik bartaraf etilgani haqidagi xabar 12-iyun kuni soat 16:01 da e’lon qilindi. Demak, shahar aholisi bir sutkadan ortiq vaqt mobaynida suv ta’minotidan uzilgan.
Avvalroq O‘zbekistonda ichimlik suvi ta’minoti og‘ir holatdagi 1545 ta mahalla suv bilan ta’minlanishi, Toshkentda ichimlik suvini rejali o‘chirish jadvali e’lon qilingani, Qashqadaryoda 1 823 kilometr ichimlik suvi tarmoqlari, 74 ta suv inshooti qurilib, rekonstruksiya qilinishi haqida xabar berilgan.
Izoh (0)