Ijtimoiy tarmoqlarda bir necha fuqarolar IIB tomonidan olib ketilayotgani aks etgan video tarqaldi. Tarmoqda tarqalgan videoda voqea Surxondaryo viloyati Sho‘rchi tumanida sodir bo‘lgani, janjal fuqaroning uyi va g‘ishtxonasi MIB tomonidan buzib tashlangani oqibatida kelib chiqqani aytilgan. MIB matbuot xizmati holat yuzasidan “Daryo”ga rasmiy ma’lumot berdi.
Aniqlanishicha, fuqarolik ishlari bo‘yicha Denov tumanlararo sudining 2022-yil 2-fevraldagi sud qaroriga asosan javobgarlar B.I., J.N., I.N., G‘.O. va G.I.ni Oltinsoy tumani “Gulchechak” mahallasida joylashgan noturar joy (parrandachilik fermasi) binosining yer maydoni qurilgan g‘isht zavodi, yashash uyi, molxona va boshqa qurilmalarni qarzdorlar hisobidan buzish hamda uy-joydan chiqarish belgilangan.
Mazkur ijro hujjati byuroning Oltinsoy tuman bo‘limi tomonidan ijro harakatlariga kirishilgan va javobgarlarga bir necha bor sud qarori tushuntirilib, ogohlantirilgan. Biroq javobgarlar sud qarori talablarini bajarmasdan o‘z ixtiyorlari bilan qurilmalarni buzmagan.
Shundan so‘ng byuroning tuman bo‘limi tomonidan majburiy ijro harakatlariga kirishilgan va 8-iyun kuni majburiy ijro tayinlanib, tegishli tashkilotlar ishtirokida majburiy ijro harakatlari amalga oshirilgan.
Majburiy ijro harakatlari davomida javobgarlar tomonidan qarshiliklar ko‘rsatilgani sababli ichki ishlar xodimlari tomonidan ishtirokchilarning xavfsizligi ta’minlangan.
Qayd etilishicha, hozirda majburiy ijro harakatlari keyingi davrda amalga oshirish uchun qoldirilgan. Holat natijalari haqida qo‘shimcha ma’lumotlar beriladi.
Viloyat IIB matbuot xizmati xabariga ko‘ra, javobgarlar ijro harakatlari bajarilishiga to‘sqinlik qilib, xodimlarni harakatlariga faol qarshilik ko‘rsatib, ma’sullarga tosh va g‘isht bo‘laklarini otgan. Natijada davlat organlari xodimlariga tan jarohati yetkazgan to‘rt nafar fuqaro majburiy tarzda tuman IIBga olib borilib, ularga nisbatan tegishli hujjatlar rasmiylashtirilgan.
Holat yuzasidan o‘rnatilgan tartibda tekshiruv ishlari o‘tkazilmoqda.
Izoh (0)