“O‘zbekneftgaz” AJ tomonidan avtobenzin narxlarining shakllanishi, taqchillikka yo‘l qo‘ymaslik bo‘yicha amalga oshirilayotgan ishlar, shuningdek, “O‘zbekneftgaz” AJ Respublika iste’molchilari uchun qancha miqdorda benzin va dizel yoqilg‘isi ishlab chiqarayotganiga oid savollarga javob berish, jamoatchilikka to‘g‘ri axborot yetkazish maqsadida OAV xodimlari va blogerlar uchun press-tur tashkil qilindi.
“O‘zbekneftgaz” AJ boshqaruvi raisi Mehriddin Abdullayev topshirig‘iga binoan, neft va gaz sohasida amalga oshirilayotgan ishlar to‘g‘risidagi keng qamrovli ma’lumotlarni jamoatchilikka o‘z vaqtida taqdim etish, aholiga tezkor va to‘liq axborot yetkazish hamda jamiyat faoliyatini ochiqligi, shaffofligini ta’minlash maqsadida, OAV vakillari hamda blogerlar Buxoro neftni qayta ishlash zavodiga taklif etildi.
“O‘zbekneftgaz” AJ tasarrufidagi Buxoro neftni qayta ishlash zavodida ommaviy axborot vositalari vakillari uchun press-tur davomida dastlab qadimiy Buxoroning tarixiy obidalariga sayohat ham uyushtirildi.
Ushbu press-turda Oliy Majlis Qonunchilik palatasi deputati Rasul Kusherbayev, jurnalist Xurshid Daliyev, Shamsiddin Nodirbek, Qosimov Zafarjon, Kasimov Xayrulla, Yaxyoyev Fayzullo, Sanjar Said, Muslim Mirzajonov, Suhrob Sherov, Isomiddin Po‘latov, blogerlar Nurbek Alimov, Temur Malik, Bahodir Ahmedov, Otabek Ortiqov, Maqsud Muzaffarov, Sherzodbek Dehqonov hamda “O‘zbekiston 24”, Buxoro televideniyesi, “Mening Yurtim”, “Sevimli”, “Zo‘r TV” telekanalari ijodiy guruhi, “Kun.uz”, “Gazeta.uz”, “UzNews.uz”, “Xabar.uz”, “Human.uz”, “Darakchi.uz”, Geolog.uz”, “Jahon.uz”, “Nuz.uz», Bukharanews, “Sof.uz” kabi 15 ga yaqin internet nashrlari jurnalistlari va 15 ga yaqin mahalliy OAV vakillari ishtirok etishdi.
OAV xodimlari va blogerlarga “O‘zbekneftgaz” AJ va uning tizimidagi korxonalar ochiqlik siyosatini to‘la qo‘llab-quvvatlashi va ularni qiziqtirgan barcha savollarga javob berilishi bildirildi.
Bugungi kunda O‘zbekiston hukumati va “O‘zbekneftgaz” AJ boshqaruvi raisi boshchiligida zamonaviy ilg‘or innovatsion texnologiyalar, yuqori samarali uskunalar, yangi materiallar, shu jumladan, yangi katalizatorlar, eskirgan uskunalarni almashtirish, yirik investitsiya loyihalarini jalb etish orqali Buxoro neftni qayta ishlash zavodini rivojlantirish bo‘yicha maqsadli ishlar olib borilayotgani borasida axborot berildi.
Yiliga 2,5 million tonna neft va gaz kondensatini qayta ishlash quvvatiga ega ushbu zavod 1997-yilning 22-avgustida foydalanishga topshirilgani va bugungi kunda zavodda yuqori oktanli benzin (AI-80, AI-91, AI-92, AI-95, AI-98), dizel yoqilg‘isi (EKO, Yevro-4, 5), aviakerosin (Djet A-1), mazut, suyultirilgan gaz, oltingugurt, pirolizli gazolin, uglevodorod eritgichi kabi neft mahsulotlari ishlab chiqarilishi bo‘yicha to‘liq ma’lumotlar berildi.
O‘zbekiston sanoatida muhim o‘rinni egallagan, davlat strategik ahamiyatidagi zavodga tashrif qilgan jurnalistlar, blogerlar maxsus kiyim, shaxsiy himoya vositalari bilan ta’minlanib, ishlab chiqarish jarayoni bilan yaqindan tanishtirildi.
Press-turning asosiy dasturi jurnalistlarni avtomobil benzini ishlab chiqarish bilan tanishtirishga qaratildi. Dastlabki tashrif quyish-to‘kish estakadasidan boshlandi, bu yerda press-tur ishtirokchilari zavodga xomashyo qayerdan keltirilishi va qanday keltirilishini bilib olishdi hamda o‘zlarini qiziqtirgan savollarga javob olishdi.
Press-tur davomida zavodda ishlab chiqariladigan turli neft mahsulotlari, jumladan, yuqori oktanli benzin (AI-80, AI-91, AI-92, AI-95, AI-98), dizel yoqilg‘isi (EKO, Yevro-4, 5), aviakerosin (Djet A-1), mazut, suyultirilgan gaz, oltingugurt, pirolizli gazolin ishlab chiqarish jarayonlari ham ko‘rsatildi.
Asosiy ishlab chiqarish sexining markaziy boshqaruv pultida texnologik jarayonning boshqarilish jarayonlariga guvoh bo‘lishdi. Ta’kidlash joizki, ishlab chiqarish jarayonida Buxoro neftni qayta ishlash zavodi mahsulot sifatini nazorat qilishga alohida e’tibor qaratadi. Zavodda texnologik jarayonning har bir bosqichida majburiy laboratoriya sinovlari o‘tkaziladi. Zavodning markaziy tahlilxonasiga tashrif doirasida jurnalistlar va blogerlar benzinning oktan sonini aniqlash qurilmasiga katta qiziqish uyg‘otdi.
OAV vakillarining benzinni ishlab chiqarish borasidagi, neft mahsulotlari narxlarining shakllanishi haqidagi savollariga to‘g‘ridan to‘g‘ri ishlab chiqarish maydonlarida javob berildi.
Bir so‘z bilan ifodalanganda, press-tur ishtirokchilariga zavodga xomashyoni qabul qilish, qayta ishlash, neft mahsulotlarini sotish — butun ishlab chiqarish zanjirining kuzatishlariga imkon yaratildi.
Mehmonlar korxona obyektlariga ekskursiya paytida benzin, dizel va aviatsiya yoqilg‘isi qanday ishlab chiqarilayotganini ko‘rishdi va ishlab chiqarilgan neft mahsulotlari barcha talablarga javob berishiga shaxsan amin bo‘lishdi.
Bunday tadbirlarning tashkil etilishi soha va jamiyat o‘rtasida sifatli muloqot o‘rnatish, aholini tezkor va batafsil ma’lumot bilan ta’minlashga yordam beradi.
Ma’lumot uchun
Buxoro neftni qayta ishlash zavodining asosiy maqsadi, O‘zbekiston Respublikasi iste’molchilarini sifatli neft mahsulotlari bilan uzluksiz ta’minlash va eksportni o‘zlashtirishga yo‘naltirilgan. 2021-yilda zavodga jami 1 604,1 ming tonna uglevodorod xomashyolari yetkazib berilgan bo‘lib, reja 115,3 foizga, shundan 443,6 ming tonnasi (neft 136,3 ming tonna, gazkondensat 152,3 ming tonna, gazoyl 153,9 ming tonna, birlamchi benzin 1,1 ming tonna) import qilingan bo‘lib, belgilangan reja 121,5 foizga bajarilgan. Jami 1599,4 ming tonna uglevodorod xomashyolari qayta ishlangan bo‘lib, reja 115,1 foizga bajarilgan.
“O‘zbekneftgaz” AJ matbuot xizmati
Izoh (0)