Turli vajlar bilan to‘lanmay kelinayotgan soliq qarzdorliklarini undirish maqsadida Farg‘ona viloyati davlat soliq boshqarmasi tomonidan Majburiy ijro byurosi viloyat boshqarmasi bilan hamkorlikda viloyatning barcha shahar va tumanlarida xatlov tadbirlari olib borilmoqda. Bu haqda viloyat DSB axborot xizmati xabar berdi.
Ma’lum qilinishicha, 2022-yil iyun oyi boshidan hozirga qadar o‘tkazilgan tadbirlar natijasida soliqdan qarzdorligi mavjud bo‘lgan 12 ta tadbirkorlik subyekti 1,2 milliard so‘m miqdoridagi to‘lovlarni amalga oshirgan. Xususan, Farg‘ona tumanida ro‘yxatdan o‘tgan “Qo‘rg‘on sifat” MCHJ vakillari bilan mavjud soliq qarzdorligi yuzasidan o‘tkazilgan suhbat natijasida 310 million so‘m miqdoridagi soliqlar davlat budjetiga to‘lab berilgan.
Farg‘ona shahridagi “Sayyor-2017” MCHJdan esa 201 million so‘m soliq qarzdorligi undirilgan. Bundan tashqari, qarzdorligi katta bo‘lgan 36 ta subyektning qariyb 48 milliard so‘m qiymatdagi mol-mulklari xatlovga olingan. Jumladan. Qo‘shtepa tumanidagi “Texmashservis” MCHJning 1,2 milliard soliq qarzdorligi uchun jamiyatning bino inshootlari xatlanib, muhrlangan.
Shuningdek, uzoq vaqtdan buyon soliqlar to‘lanmasligi natijasida 5,8 milliard so‘m miqdoridagi qarzdorligi yuzaga kelgan “Issiqlik manbai” DUKning ham bino-inshootlari xatlovga olingan.
O‘zbekiston tumanida olib borilgan tadbirlarda esa “Sho‘rsuv g‘isht zavod” MCHJning 82 million so‘m soliq qarzi hisobiga jamiyatga tegishli Nexia rusumli transport vositasi xatlanib, vaqtincha saqlash joyiga olib kirilgan.
Eslatib o‘tamiz, may oyida Farg‘onada bir kunda soliq qarzdorlarining 8,1 milliard so‘mlik mol-mulklari xatlovga olingandi.
Izoh (0)