Buxoro shahri Piridastgir ko‘chasidan o‘tuvchi markaziy ichimlik suvi quvurida nosozlik yuzaga kelgani tufayli 12-iyun kuni shahar aholisining ichimlik suvi ta’minoti vaqtincha to‘xtatildi. Bu haqda “O‘zsuvta’minot” xabar qildi.
Qayd etilishicha, Buxoro viloyat hokimi Botir Zaripov ta’mirlash ishlari olib borilayotgan joyga borib, jarayon bilan shaxsan tanishgan. Ayni paytda ta’mirlash ishlari davom etmoqda. Shisha tolali hobusning diametri 700 millimetr bo‘lgan po‘lat quvurga almashtirish rejalashtirilgan. Shundan so‘ng quvurni payvandlash ishlari amalga oshilirib, yakunda shaharda suv ta’minoti tiklanadi.
“Ishlarni jadallashtirish, shaharda suv ta’minotini tiklash bo‘yicha mutasaddilarga tegishli tavsiyalar berilgan”, — deyiladi xabarda.
Buxoro viloyati hokimligi suv ta’minotidagi uzilish haqida kecha, 11-iyun kuni soat 15:12 da xabar qildi. Bundan kelib chiqadiki, shahar aholisi qariyb 20 soatdan buyon suvsiz qolmoqda.
12-iyun kuni soat 06:23 da berilgan ma’lumotda esa nosozlikni bartaraf etish choralari ko‘rilayotgani, tez orada suv ta’minoti tiklanishi haqida xabar berilgan.
Avvalroq O‘zbekistonda ichimlik suvi ta’minoti og‘ir holatdagi 1545 ta mahalla suv bilan ta’minlanishi, Toshkentda ichimlik suvini rejali o‘chirish jadvali e’lon qilingani, Qashqadaryoda 1 823 kilometr ichimlik suvi tarmoqlari, 74 ta suv inshooti qurilib, rekonstruksiya qilinishi haqida xabar berilgan.
Izoh (0)