Россия бош вазири Михаил Мишустин мамлакат БМТнинг Жаҳон сайёҳлик ташкилоти (UNWTO) таркибидан чиқиши тўғрисидаги ҳужжатни имзолади, деб ёзади «Коммерсантъ». СССР ташкилотга 1975 йилда аъзо бўлган, Россия эса совет иттифоқининг қонуний давомчиси сифатида унинг таркибида қолган эди.
«‘Россия Федерациясининг халқаро шартномалари тўғрисида’ги федерал қонуннинг 36-моддасига мувофиқ, Россия Ташқи ишлар вазирлигининг ижро этувчи ҳокимиятнинг манфаатдор федерал органлари билан келишилган, Россия Федерациясининг Жаҳон сайёҳлик ташкилотидан чиқиши ҳақидаги таклифи қабул қилинсин», — дейилади ҳуқуқий ахборот порталида эълон қилинган ҳужжатда.
«Ростуризм» раҳбари Зарина Догузова Россиянинг БМТ Жаҳон сайёҳлик ташкилотидан чиқишини изоҳлади. Унинг фикрича, Россия халқаро сайёҳлик майдонида қолади ҳамда ички ва халқаро туризмни ривожлантиришда давом этади.
Догузованинг сўзларига кўра, Москва оммабоп хорижий таътил йўналишлари бўйича ҳамкасблари билан доимий алоқада бўлиб турибди.
27 апрель куни БМТ Жаҳон сайёҳлик ташкилоти Россия жорий йил охиригача ташкилот таркибидан чиқишини маълум қилганди. Шу куниёқ Гватемала, Литва, Колумбия, Польша, Словения ва Украина каби бир қатор мамлакатлар сўровидан кейин Россияни унинг Украинадаги ҳарбий операцияси туфайли UNWTO’дан чиқариш режалаштирилган эди. Бироқ Россия овоз бериш якунларини кутмасдан, ташкилотдан кетиш ниятини ўзи маълум қилди.
Мавзуга доир:
- БМТ Россия қўшинларини Украинадан олиб чиқишни талаб қилувчи резолюция қабул қилди. Унга фақат Россия ва яна 4 та давлат қарши овоз берган
- БМТ Бош Ассамблеяси Россияни Инсон ҳуқуқлари бўйича кенгашдан чиқаришга овоз берди. Россия кенгашдаги ваколатларини муддатидан олдин тугатмоқчи
- «Яқин орада тинчликка эришиш имконияти йўқ». БМТ бош котиби Украина—Россия музокаралари ҳақида
Изоҳ (0)