Freedom Finance sarmoya kompaniyasi asoschisi Timur Turlov Rossiya fuqaroligidan voz kechdi. Bu haqda Forbes xabar berdi.
9-iyun kuni Turlov o‘zining Instagram sahifasida Qozog‘iston pasportini olganini ma’lum qildi.
Bu yerda erkin nafas olyapman. Ishonamanki, Qozog‘iston o‘zining tinchliksevar va mehmondo‘st siyosati tufayli yangi, boyroq, samaraliroq, adolatli davlat barpo eta oladi, — deb yozadi u.
Turlovning vakili Qozog‘iston ikkinchi fuqarolikka ruxsat bermasligini, shuning uchun tadbirkor Rossiya pasportidan ham, Karib dengizidagi Sent-Kits va Nevis shtatining pasportidan ham voz kechishi kerakligini tushuntirdi.
Uning so‘zlariga ko‘ra, fuqarolikka qabul qilish jarayoni bundan besh yil avval, Turlov respublikada yashash uchun ruxsatnoma olgan paytda boshlangan. Besh yillik yashash uchun ruxsatnoma fuqarolikni olish uchun asosiy talab hisoblanadi.
Timur Turlov Qozog‘istonning soliq rezidenti bo‘lib, u yerda 10 yildan ortiq oilasi bilan yashaydi.
Tadbirkor Qozog‘iston immigratsiya xizmatiga ikki davlat fuqaroligidan voz kechish to‘g‘risidagi hujjatlarni taqdim etganini aytdi — busiz u Qozog‘iston pasportini ololmaydi.
Timur Turlov Freedom Finance investitsiya kompaniyasi, Freedom24 onlayn brokeri va Freedom Finance Bank’ni o‘z ichiga olgan Freedom Holding asoschisi va asosiy egasidir.
2021-yilda u birinchi marta Forbes global ro‘yxatiga kiritildi va 2,1 mlrd dollar boyligi bilan 1517-o‘rinni egalladi.
2022-yilda Turlovning boyligi 2,4 mlrd dollarga baholanib, rossiyaliklar orasida 36-o‘rinni egalladi. U bu mablag‘ bilan Qozog‘iston fuqarolari ro‘yxatida beshinchi o‘rinda bo‘lardi.
Avvalroq Timur Turlov O‘zbekistondagi investitsiya faoliyati to‘g‘risida gapirib o‘tgan edi.
Izoh (0)