Investitsiyalar va tashqi savdo vazirligida Janubiy Koreyaning BNK Financial Group direktorlar kengashi a’zosi va ijrochi direktori Li Du-Xo boshchiligidagi delegatsiya bilan uchrashuv bo‘lib o‘tdi.
Muzokaralar chog‘ida kompaniyaning O‘zbekiston bank-moliya bozoriga kirishiga doir investitsiyaviy rejalari bilan bog‘liq masalalar atroflicha muhokama qilindi. Xorijiy tomon kompaniya faoliyati hamda uning xalqaro miqyosdagi ilg‘or tajribasi haqida batafsil ma’lumot berdi.
BNK Financial Group kompaniyasi Busan Bank, Kyongnam Bank, BNK Capital va boshqa moliyaviy kompaniyalardan 2011-yilda Pusan shahrida tashkil topgan moliyaviy guruhdir.
Kompaniya Janubiy Koreyada 379 ta filial va 114 ta bo‘lim, shuningdek, chet elda 28 ta filial va 3 ta vakolatxonaga ega. BNK Financial Group aktivlari 100 mlrd AQSH dollaridan oshadi.
Uchrashuv chog‘ida ikkala tomon manfaatlaridan kelib chiqqan holda, O‘zbekistonda faoliyat yuritayotgan xorijiy investorlar huquqlarini mustahkam himoya qiluvchi qonunlar alohida muhokama qilindi.
Muzokaralar yakunida tomonlar bir qator qo‘shimcha uchrashuvlar o‘tkazishga kelishib oldi.
Ularning maqsadi Janubiy Koreyaning moliyaviy guruhi bilan konstruktiv muloqot olib borib, uning O‘zbekiston bozoriga kirishiga yordam berishdir. Buning uchun birgalikda olib boriladigan tadbirlar rejasi ishlab chiqiladi.
Avvalroq Zara va Bershka egasi O‘zbekistonda loyihani ishga tushirishni muhokama qilayotgani haqida xabar berilgan edi.
Izoh (0)