Freedom Finance сармоя компанияси асосчиси Тимур Турлов Россия фуқаролигидан воз кечди. Бу ҳақда Forbes хабар берди.
9 июнь куни Турлов ўзининг Instagram саҳифасида Қозоғистон паспортини олганини маълум қилди.
Бу ерда эркин нафас оляпман. Ишонаманки, Қозоғистон ўзининг тинчликсевар ва меҳмондўст сиёсати туфайли янги, бойроқ, самаралироқ, адолатли давлат барпо эта олади, — деб ёзади у.
Турловнинг вакили Қозоғистон иккинчи фуқароликка рухсат бермаслигини, шунинг учун тадбиркор Россия паспортидан ҳам, Кариб денгизидаги Сент-Киц ва Невис штатининг паспортидан ҳам воз кечиши кераклигини тушунтирди.
Унинг сўзларига кўра, фуқароликка қабул қилиш жараёни бундан беш йил аввал, Турлов республикада яшаш учун рухсатнома олган пайтда бошланган. Беш йиллик яшаш учун рухсатнома фуқароликни олиш учун асосий талаб ҳисобланади.
Тимур Турлов Қозоғистоннинг солиқ резиденти бўлиб, у ерда 10 йилдан ортиқ оиласи билан яшайди.
Тадбиркор Қозоғистон иммиграция хизматига икки давлат фуқаролигидан воз кечиш тўғрисидаги ҳужжатларни тақдим этганини айтди — бусиз у Қозоғистон паспортини ололмайди.
Тимур Турлов Freedom Finance инвестиция компанияси, Freedom24 онлайн брокери ва Freedom Finance Банкъни ўз ичига олган Freedom Holding асосчиси ва асосий эгасидир.
2021 йилда у биринчи марта Forbes глобал рўйхатига киритилди ва 2,1 млрд доллар бойлиги билан 1517-ўринни эгаллади.
2022 йилда Турловнинг бойлиги 2,4 млрд долларга баҳоланиб, россияликлар орасида 36-ўринни эгаллади. У бу маблағ билан Қозоғистон фуқаролари рўйхатида бешинчи ўринда бўларди.
Аввалроқ Тимур Турлов Ўзбекистондаги инвестиция фаолияти тўғрисида гапириб ўтган эди.
Изоҳ (0)