Financial Times tahlilchilariga ko‘ra, Yevropa Ittifoqida energiya narxining oshishi va yuqori xarajatlar iqtisodiyotni retsessiyaga olib kelishi mumkin. Yaqin kelajakda bunday oqibatlarga yo‘l qo'ymaslik uchun Yevropa Markaziy banki bazaviy stavkasini oshirishi kerak.
Koronavirus oqibatida Yevropada iqtisodiy o‘sish sezilarli darajada sekinlashdi. Yalpi ichki mahsulot 2021-yilning so‘nggi choragida atigi 0,3 foizga, 2022-yilning ilk choragida esa o,2 foizga o‘sdi. Bu Rossiya va Ukraina o‘rtasidagi urush bilan bir vaqtga to‘g‘ri keldi.
Tahlilchilarning fikriga ko‘ra, Yevropa Ittifoqi davlatlari energiya tashuvchilarning sof importchisi sifatida byudjet xarajatlarini minimallashtirishi, resurslarga talab va taklif o‘rtasidagi muvozanatni tiklashi kerak.
1973-yilda Yevropada neft inqirozi bo‘lgan edi. O‘sha paytda bir qancha mamlakatlar stavkalarni oshirish yordamida inflyatsiya jarayonlarini tezda bostira olgan.
Buni amalga oshirishdan qochgan Italiya va Fransiya uzoq davom etgan yuqori inflyatsiya bilan kurashadi va uni yengib o‘tish uchun 80-yillar boshida yanada chuqurroq iqtisodiy tanazzulga yuz tutadi.
9-iyun kuni Yevropa Markaziy banki iqtisodiy vaziyatning yomonlashuvi va inflyatsiyaning o'sishini ko'rsatuvchi hisobotni e'lon qildi.
Regulyator bunday jarayonlarning asosiy sababi Ukrainadagi urush va uning oqibatlari, energiya resurslari va mahsulotlari narxining oshishi, shuningdek, xalqaro savdoning murakkablashishini ko‘rsatgan.
Avvalroq Yevropa iqtisodiyoti urushga qaramay, kutilganidan ham ko‘proq o‘sgani haqida xabar berilgan edi.
Izoh (0)