Yevropa Ittifoqining ijroiya organi bo‘lmish Yevrokomissiya Ukrainaga YIga nomzod maqomini berishni tavsiya qilmoqchi. Bu haqda Bloomberg manbalarga tayanib xabar berdi.
Yevropa Ittifoqiga kiruvchi barcha davlatlar vakillarini o‘z ichiga olgan YI komissarlari kollegiyasi 17-iyun kuni tavsiyanomani muhokama qilish va qabul qilishni rejalashtirmoqda.
Yevropa Komissiyasining yakuniy xulosasi YI mamlakatlari tomonidan tasdiqlanishi kerak. Blok yetakchilari bu masalani 23—24-iyun kunlari Bryusselda bo‘lib o‘tadigan sammitda muhokama qilmoqchi.
YIning ayrim davlatlari Ukrainaga nomzod maqomini berishni ma’qullamayapti. Bloomberg ma’lumotlariga ko‘ra, Daniya va Niderlandiya bunga qarshi, Germaniya esa Ukrainaga shartli nomzod maqomini berishni taklif qilmoqda.
Ukraina bosh vazirining Yevropa va Yevroatlantika integratsiyasi bo‘yicha o‘rinbosari Olga Stefanishinaning aytishicha, 9-iyun kuni Yevroittifoqning yettita davlati YIga nomzod maqomiga qo‘shimcha ravishda “boshqa format bo‘yicha takliflar kiritgan”.
“Ko‘p turli xil takliflar bo‘ldi, lekin aslida uchta asosiy davlat borki, ular bugungi kunda Ukrainaga yashil chiroq yoqishni istamayapti”, — dedi Stefanishina va bu davlatlar nomini aytishdan bosh tortdi.
Ukraina prezidenti Vladimir Zelenskiy fevral oyi oxirida, urush boshlanganidan so‘ng mamlakatning Yevropa Ittifoqiga qo‘shilishi uchun rasman ariza bergan edi. Aprel oyida Yevrokomissiya prezidenti Ursula fon der Lyayen Kiyevga tashrifi chog‘ida Ukraina prezidentiga YIga kirish uchun to‘ldiriladigan anketani topshirgan.
Izoh (0)