Qirg‘izistonning Jalolobod viloyatida “Qambar-Ota-1” gidroelektrostansiyasini qurish boshlandi, deb yozmoqda Anadolu.
Norin daryosidagi ushbu eng yirik GES poydevorini qo‘yish marosimida Qirg‘iziston prezidenti Sadir Japarov, Vazirlar Mahkamasi a’zolari va mahalliy aholi ishtirok etdi.
“Bugun biz Markaziy Osiyodagi eng yirik GESlardan birining qurilishini boshlayapmiz, bu mamlakatimizning energetik xavfsizligini ta’minlaydi!” — dedi Japarov marosimda.
Davlat rahbari energetika butun mamlakat iqtisodiyoti uchun strategik ahamiyatga ega bo‘lgan tarmoq, shuningdek, iqtisodiy o‘sish va barqaror rivojlanishning o‘zagi ekanini ta’kidladi.
Uning so‘zlariga ko‘ra, butun dunyo bo‘ylab raqamlashtirish davrida, elektr transport vositalari va xususiy uylardan tortib, butun boshli shaharlargacha aqlli texnologiyalarning rivojlanish sur’atlari oshib borayotgan bir paytda elektr energiyasining ahamiyati ham oshdi.
Japarov Qirg‘izistonda 30 yil davomida birorta ham GES qurilmaganini, shu sababli elektr energiyasini import qilishga to‘g‘ri kelganini ta’kidladi.
“Qambar-Ota-1ning ishga tushirilishi Qirg‘izistonga ham, Markaziy Osiyoga ham foyda keltiradi. Hammaga ma’lumki, ‘Qambar-Ota-1’ GES qurilishi qo‘shni mamlakatlarda irrigatsiya bilan bog‘liq muammolarni hal qilish uchun keng imkoniyatlar yaratadi va mintaqadagi suv-energetika balansini barqarorlashtirishga xizmat qiladi”, — dedi Qirg‘iziston rahbari.
Izoh (0)