Қирғизистоннинг Жалолобод вилоятида «Қамбар-Ота-1» гидроэлектростанциясини қуриш бошланди, деб ёзмоқда Anadolu.
Норин дарёсидаги ушбу энг йирик ГЭС пойдеворини қўйиш маросимида Қирғизистон президенти Садир Жапаров, Вазирлар Маҳкамаси аъзолари ва маҳаллий аҳоли иштирок этди.
«Бугун биз Марказий Осиёдаги энг йирик ГЭСлардан бирининг қурилишини бошлаяпмиз, бу мамлакатимизнинг энергетик хавфсизлигини таъминлайди!» — деди Жапаров маросимда.
Давлат раҳбари энергетика бутун мамлакат иқтисодиёти учун стратегик аҳамиятга эга бўлган тармоқ, шунингдек, иқтисодий ўсиш ва барқарор ривожланишнинг ўзаги эканини таъкидлади.
Унинг сўзларига кўра, бутун дунё бўйлаб рақамлаштириш даврида, электр транспорт воситалари ва хусусий уйлардан тортиб, бутун бошли шаҳарларгача ақлли технологияларнинг ривожланиш суръатлари ошиб бораётган бир пайтда электр энергиясининг аҳамияти ҳам ошди.
Жапаров Қирғизистонда 30 йил давомида бирорта ҳам ГЭС қурилмаганини, шу сабабли электр энергиясини импорт қилишга тўғри келганини таъкидлади.
«Қамбар-Ота-1нинг ишга туширилиши Қирғизистонга ҳам, Марказий Осиёга ҳам фойда келтиради. Ҳаммага маълумки, ‘Қамбар-Ота-1’ ГЭС қурилиши қўшни мамлакатларда ирригация билан боғлиқ муаммоларни ҳал қилиш учун кенг имкониятлар яратади ва минтақадаги сув-энергетика балансини барқарорлаштиришга хизмат қилади», — деди Қирғизистон раҳбари.
Изоҳ (0)