“Shoirni nima jin urdi bilmayman, birdan o‘zgardi” — Mansur Agaliyev Yulduz Usmonovaning shoir bilan mojorosi qanday yakun topganiga oydinlik kiritdi (video)

O‘zbekiston xalq artisti Yulduz Usmonovaning turmush o‘rtog‘i Mansur Agaliyev “Daryo” muxbiri Nargiza Murodovaga bergan intervyusida shoir Yo‘lchi Ro‘ziyev bilan bog‘liq sud qanday yakun topganiga oydinlik kiritdi.

— Shoir Yo‘lchi Ro‘ziyev bilan kelishib olindi. Ammo sudda ishlaydiganlarni unchalik tushunmadim. Jinoyat ishlari bilan shug‘ullanadigan sudning media sohasiga nima aloqasi bor? Bu soha vakillari qo‘shiqni ijodkordek tushunishmaydi-ku.Shoir bilan kelishdik, “Bu qo‘shiq biz uchun o‘ldi!” dedim. Shu bilan birga u yigit ham ijodini o‘ldirgandek bo‘ldi. Chunki ommaga chiqib, “She’r uchun pul bermadi”, deyishi haqiqatga to‘g‘ri kelmaydi. Bitta konsertda ishtirok etadigan orkester uchun 300-400 million pul berayotgan odam she’r uchun 200-300 AQSH dollarini berolmaymanmi?Menimcha, dushman bilan urishgandan foyda yo‘q. Uni yaxshilik qilib uyaltirish kerak. Ammo Yulduz opangiz bo‘lgan ishlardan qattiq xafa bo‘ldi. Chunki sud ishi boshlanganidan keyin 4 oygacha unga bildirmaslikka harakat qildik. Ammo bir kuni yo‘lda ketayotgan “uchastkavoy” to‘xtatdi. “Nima muammo menga ayting”, desam “Opani o‘zlari bilan gaplashishim kerak”, dedi. Dabdurustdan “Opa sizni ustingizdan ariza tushgan”, degandi Yulduz yig‘lab yubordi. Shunga ham yig‘laysizmi, deb uni yupatdim, ammo u xafa bo‘ldi.Aslida bu qo‘shiqning yaratilish tarixi bor. Konsert arafasida “Xalqlar do‘stligi” san’at saroyidagi kassani bahoriy qilib bezatishga qaror qildim. Saroy kassasi qanchalik sovuq va zax ekanini ko‘pchilik biladi. Qishda esa yanada sovuq bo‘ladi. Dizayn tayyor bo‘lgunicha o‘sha yerda turib, tobim qochib qoldi. Qiynalayotganimni ko‘rgach, yig‘lab o‘sha she’rni qayerdandir topib qo‘shiq qilgan. Ammo she’rda “Kasal bo‘lma, Mohinur” deb yozilgandi. Qo‘shiq chiroyli chiqishi va musiqaga mos bo‘lishi uchun “xasta” so‘zi bilan bog‘liq naqoratni yozgan.Shoir yomon bola emas edi. Nima jin urdi, bilmayman birdan o‘zgarib qoldi. Balki haqiqatan ham pulga muhtoj bo‘lib qolgandir, bilmayman. Olgan pulini yaxshi kunlariga ishlatsin, — deydi Yulduz Usmonovaning turmush o‘rtog‘i Mansur Agaliyev.

Eslatib o‘tamiz, shoir Yo‘lchi Ro‘ziyev Yulduz Usmonovadan “Xasta bo‘lma” she’ri uchun 3 yildan buyon qalam haqini ololmayotgani haqida xabar berilgandi. Toshkent shahar sudlarining ma’lum qilishicha, 2021-yilning 20-sentabr kuni Fuqarolik ishlari bo‘yicha Mirzo Ulug‘bek tumanlararo sudiga “Xasta bo‘lma” qo‘shig‘ining she’r muallifidan mualliflik huquqlari buzilishiga chek qo‘yish, mualliflik huquqlari buzilgani uchun tovon puli va ma’naviy zarar undirish haqidagi da’vo arizasi kelib tushgan.Mazkur da’vo arizasi bo‘yicha fuqarolik ishi qo‘zg‘atilgan. 29-oktabr kuni qabul qilingan hal qiluv qarori bilan da’vo ariza qisman qanoatlantirilib, Yulduz Usmonovadan da’vogar Yo‘lchi Ro‘ziyevga 50 million so‘m ma’naviy zarar uchun kompensatsiya, bazaviy hisoblash miqdorining 500 barobar miqdorida (135 million so‘m) yetkazilgan zarar hisobiga tovon puli undirish belgilangan.Keyinchalik 18-yanvar kuni Fuqarolik ishlari bo‘yicha Toshkent shahar sudida Yulduz Usmonovaning tuman sudi qarori bo‘yicha shikoyat apellyatsiyasi ko‘rib chiqilgan. Sud ajrimiga ko‘ra, 29-oktabrdagi hal qiluv qarori o‘zgarishsiz, apellyatsiya shikoyati qanoatlantirilmasdan qoldirilgan.