Dilnoza Kubayevadan Zarina Nizomiddinovagacha. Mualliflik qo‘shiqlariga ega bo‘lgan mashhur o‘zbek aktrisalari (video)

Aktrisalikdan uzoqlashgan Sevara Soliyeva faqat qizlardan iborat ansamblni tuzib, qo‘shiqchilik faoliyatini boshlaganini ma’lum qildi. Ammo uning hozircha birorta mualliflik qo‘shiqlari yo‘q.  Ammo o‘zbek aktrisalari orasida mashhur bo‘lishiga qaramay, o‘zini qo‘shiqchilik sohasida ham sinab ko‘rayotganlar ham bor. Keling, bir necha yil avval qo‘shiq aytgan yoki endi o‘zidagi xonandalik mahoratini kashf etayotgan ijodkorlar bilan tanishamiz.

Dilnoza Kubayeva

Mahoratli aktrisa Dilnoza Kubayeva shu kungacha “Elda bo‘lsin”, “Hayot go‘zal”, “Leylam” kabi qo‘shiqlarni ijro etgan. Bundan tashqari, teleloyihalar uchun Alisher Fayz bilan “Yangi yil”, Murod Rajabov bilan “Kel, kel dedim” nomli duyetlarni ham ijro etgan. Hayratlanarlisi shundaki, eng talabgir bo‘lgan aktrisa ham keyingi paytlarda mualliflik qo‘shiqlarini yaratib, ularga klip suratga olmoqda.

— Qo‘shiq aytish shunchaki sevimli xobbilarimdan biri. Hozircha undan biror maqsadni ko‘zlaganim yo‘q. Aslida mualliflik qo‘shiqlarimni uzoq tanaffuslar oralig‘ida ijro etganman. Faqat ular ijtimoiy tarmoqlarga ketma-ket joylandi, xolos, — deydi Dilnoza Kubayeva.

Zarina Nizomiddinova

Ayni kunda farzandlarining tarbiyasi bilan band bo‘lgan aktrisa Zarina Nizomiddinova 2014-yili xonandalik faoliyatini boshlagandi. U “Afsonaviy” va “Meni kechir” nomli qo‘shiqlarni ijro etib, klip suratga olgandi. Bundan tashqari, yosh ijodkor bilan “Sen yuragimda” nomli duyet taronani ham ijro etgandi.

Asal Shodiyeva

Asal Shodiyeva aktrisa bo‘lmasidan avval xonandalik bilan shug‘ullangan. U davlat tadbirlarida ishtirok etib, “O‘zbekison” nomli qo‘shig‘ini ijro etardi. Shu kungacha, aktrisa Asal Shodiyevaning “Soxta” va “Chegarasiz” nomli mualliflik qo‘shiqlari ham bor. Farzandlar tarbiyasi bilan band bo‘lgan aktrisa yaqinda “Uchta so‘z” nomli qo‘shiq va klipni taqdim etdi. Afsuski, qo‘shiq YouTube tarmog‘iga joylangach, u qadar iliq fikrlar bo‘lmadi. Kuzatuvchilarning ko‘pchiligi “Hurmatingizni bilib, qo‘shiq aytmang”, degan ma’nodagi izohlarni qoldirdi.

Sitora Alimjonova

Aktrisa Sitora Alimjonova 8 yil avval xonandalik faoliyatini rasman boshlagandi. Afsuski, ko‘p o‘tmay unga prodyuserlik qilgan kompaniya bilan moliyaviy kelishuvga erishmay, xonandalik faoliyatiga nuqta qo‘ygan. U teleloyihalar uchun Otabek Mutalxo‘jayev bilan “Sevar yorim”, Yodgor Mirzajonov bilan “Tegaman” duyetlarini ijro etgan. “Yo‘g‘uborim” va “Opajonim” singari mualliflik qo‘shiqlarini ham ijro etgan. U hozir to‘y xizmatlariga faqatgina “Opajonim” qo‘shig‘ini ijro etish uchun boradi.

Shahzoda Muhammedova

Aktrisa Shahzoda Muhammedova 9 yil avval “Sensiz” nomli qo‘shiqni ijro etgan. Qo‘shiqning klipida ukasi Xojiakbar rol ijro etgan. Keyinchalik u Diyorbek Mahkamov, Qilichbek Mamadaliyev va Ozoda Nursaidovalarning taklifiga ko‘ra ular bilan duyet kuylagan.

Jamila G‘ofurova

Aktrisa Jamila G‘ofurova hech qachon xonanda bo‘lishni orzu qilmagan. Faqatgina takliflarni rad etmaslik uchun qo‘shiq kuylagan. Aktrisa shu kungacha teleloyihalar uchun “Habibim” va “Yeyasim galdi” qo‘shig‘ini duyet tarzida ijro etgan. Bundan tashqari, u besh yil avval xonanda Davron Ergashev bilan “Bidir-bidir” nomli duyetni ijro etgan. 2021-yili esa “Xiyonat” nomli qo‘shiqni ham yaratgan.

Oydin Yusupova

Anchadan buyon kino va seriallarda ko‘rinish bermayotgan aktrisa Oydin Yusupova 10 yil avval “Fayruz” guruhi bilan “Afsus” nomli duyetni ijro etgan. Oradan ancha vaqt o‘tib, xonandalik faoliyatini ham boshlaganini ma’lum qilgandi. U “Kel” nomli qo‘shig‘iga klip suratga olib, ommaga taqdim etgan. Afsuski, hozirgi kunda u na qo‘shiq, na rol ijro etadi.

Jayrona Hasanova

Ayni kunlarda salbiy rollari bilan tomoshabinlarga yaxshi tanish bo‘lgan aktrisa Jayrona ijodini xonandalikdan boshlagan. U “Seni o‘yladim”, “Unutolmadim”, “Hayot” kabi mualliflik qo‘shiqlarini ijro etgan. Afsuski, faoliyatini davom ettirishga moddiy imkoniyati bo‘lmagani uchun ko‘rsatuvlarda boshlovchilik qilgan. Undan keyin rejissorlar uni rollarga taklif etgan. Hozirda uni to‘ylarga xonanda emas, boshlovchi sifatida taklif etishadi.

Xonzoda

Aktrisa va bloger Xonzoda ham qo‘shiq ijro etgan. U o‘tgan yili “Salom, Xanna” qo‘shig‘ini ijro etgandi. Afsuski, qo‘shiq u qadar muvaffaqiyatli bo‘lmadi. Shu boisdanmi ijodkor shu kungacha boshqa qo‘shiq ijro etgani yo‘q.

Durdona Qurbonova

Aktrisa Durdona Qurbonova ham xonandalik faoliyatini boshladi. Hozircha u faqatgina Bilol bilan birga “Leylam” qo‘shig‘ini ijro etgan xolos. Ammo xonanda duyetdoshi bilan birga to‘y xizmatlarida ishtirok etmoqda. Xonanda rasman xonandalik faoliyatini boshlaganini ham Instagram orqali ma’lum qildi.