«Шоирни нима жин урди билмайман, бирдан ўзгарди» — Мансур Агалиев Юлдуз Усмонованинг шоир билан можороси қандай якун топганига ойдинлик киритди (видео)

Ўзбекистон халқ артисти Юлдуз Усмонованинг турмуш ўртоғи Мансур Агалиев «Дарё» мухбири Наргиза Муродовага берган интервьюсида шоир Йўлчи Рўзиев билан боғлиқ суд қандай якун топганига ойдинлик киритди.

— Шоир Йўлчи Рўзиев билан келишиб олинди. Аммо судда ишлайдиганларни унчалик тушунмадим. Жиноят ишлари билан шуғулланадиган суднинг медиа соҳасига нима алоқаси бор? Бу соҳа вакиллари қўшиқни ижодкордек тушунишмайди-ку.Шоир билан келишдик, «Бу қўшиқ биз учун ўлди!» дедим. Шу билан бирга у йигит ҳам ижодини ўлдиргандек бўлди. Чунки оммага чиқиб, «Шеър учун пул бермади», дейиши ҳақиқатга тўғри келмайди. Битта концертда иштирок этадиган оркестер учун 300-400 миллион пул бераётган одам шеър учун 200-300 АҚШ долларини беролмайманми?Менимча, душман билан уришгандан фойда йўқ. Уни яхшилик қилиб уялтириш керак. Аммо Юлдуз опангиз бўлган ишлардан қаттиқ хафа бўлди. Чунки суд иши бошланганидан кейин 4 ойгача унга билдирмасликка ҳаракат қилдик. Аммо бир куни йўлда кетаётган «участкавой» тўхтатди. «Нима муаммо менга айтинг», десам «Опани ўзлари билан гаплашишим керак», деди. Дабдурустдан «Опа сизни устингиздан ариза тушган», деганди Юлдуз йиғлаб юборди. Шунга ҳам йиғлайсизми, деб уни юпатдим, аммо у хафа бўлди.Аслида бу қўшиқнинг яратилиш тарихи бор. Концерт арафасида «Халқлар дўстлиги» санъат саройидаги кассани баҳорий қилиб безатишга қарор қилдим. Сарой кассаси қанчалик совуқ ва зах эканини кўпчилик билади. Қишда эса янада совуқ бўлади. Дизайн тайёр бўлгунича ўша ерда туриб, тобим қочиб қолди. Қийналаётганимни кўргач, йиғлаб ўша шеърни қаердандир топиб қўшиқ қилган. Аммо шеърда «Касал бўлма, Моҳинур» деб ёзилганди. Қўшиқ чиройли чиқиши ва мусиқага мос бўлиши учун «хаста» сўзи билан боғлиқ нақоратни ёзган.Шоир ёмон бола эмас эди. Нима жин урди, билмайман бирдан ўзгариб қолди. Балки ҳақиқатан ҳам пулга муҳтож бўлиб қолгандир, билмайман. Олган пулини яхши кунларига ишлацин, — дейди Юлдуз Усмонованинг турмуш ўртоғи Мансур Агалиев.

Эслатиб ўтамиз, шоир Йўлчи Рўзиев Юлдуз Усмоновадан «Хаста бўлма» шеъри учун 3 йилдан буён қалам ҳақини ололмаётгани ҳақида хабар берилганди. Тошкент шаҳар судларининг маълум қилишича, 2021 йилнинг 20 сентябрь куни Фуқаролик ишлари бўйича Мирзо Улуғбек туманлараро судига «Хаста бўлма» қўшиғининг шеър муаллифидан муаллифлик ҳуқуқлари бузилишига чек қўйиш, муаллифлик ҳуқуқлари бузилгани учун товон пули ва маънавий зарар ундириш ҳақидаги даъво аризаси келиб тушган.Мазкур даъво аризаси бўйича фуқаролик иши қўзғатилган. 29 октябрь куни қабул қилинган ҳал қилув қарори билан даъво ариза қисман қаноатлантирилиб, Юлдуз Усмоновадан даъвогар Йўлчи Рўзиевга 50 миллион сўм маънавий зарар учун компенсация, базавий ҳисоблаш миқдорининг 500 баробар миқдорида (135 миллион сўм) етказилган зарар ҳисобига товон пули ундириш белгиланган.Кейинчалик 18 январь куни Фуқаролик ишлари бўйича Тошкент шаҳар судида Юлдуз Усмонованинг туман суди қарори бўйича шикоят апелляцияси кўриб чиқилган. Суд ажримига кўра, 29 октябрдаги ҳал қилув қарори ўзгаришсиз, апелляция шикояти қаноатлантирилмасдан қолдирилган.