Shakira qachonlardir Pikeni deb Argentina prezidentining o‘g‘lidan voz kechgandi: mashhur xonanda va futbolchining sevgi tarixi

Kolumbiyalik qo‘shiqchi va taniqli futbolchi 11 yillik munosabatlardan so‘ng kutilmaganda ajralishlarini e’lon qildi. El Periodico nashrining xabar berishicha, xonanda Pikening xiyonat qilayotganini bilib qolgan. Ispaniyalik futbolchi jamoadoshi Riki Puch bilan birgalikda tungi klublarga tez-tez tashrif buyurgan. Klublarda Pikeni begona ayollar bilan birga ko‘rishgan. “Wday.ru” nashri ularning romantikasi qanday boshlanganini va qanday rivojlanganini yodga oladi.

Pike va Shakira bir-biriga shunchalik mos ediki, ular bir butun va bir-birini to‘ldiradigan juftlik sifatida qabul qilindi. Ajablanarlisi shundaki, qo‘shiqchi va futbolchi bir kunda, 2-fevralda tug‘ilgan, ammo o‘n yil farq bilan. Ikkala sevishganni hech narsa ajrata olmaydiganga o‘xshardi, ammo taqdirning o‘z rejasi bor ekan.

Ular ilk bor tanishganlarida Shakiraning Jerarddan katta ekanligi “Barselona” himoyachisini umuman tashvishga solmadi. Pike mashhur qo‘shiqchini Waka-Waka klipini suratga olish maydonchasida uchratganidan keyin chinakamiga sevib qoldi. Shakiraning so‘zlariga ko‘ra, mazkur qo‘shiq 2010-yilgi FIFA Jahon chempionatining rasmiy madhiyasiga aylangan bo‘lsa-da, o‘zi hech qachon futbolning ashaddiy muxlisi bo‘lmagan va Jerar Pike kimligini bilmas ham edi.

Vaholanki, futbolchining o‘zi mashhur qo‘shiqchi haqida juda ko‘p narsa bilardi. Shuning uchun xonanda bilan munosabatlarda birinchi qadamni aynan Pike qo‘ydi. Taniqli futbolchi keyinchalik tan olganidek, hammasi uning beg‘araz xabaridan boshlandi: u qo‘shiqchidan Janubiy Afrikadagi ob-havo haqida so‘radi, chunki Shakira o‘sha yerda bo‘lib, chempionat ochilishida qo‘shiq kuylashi kerak edi. Jerar esa endigina mamlakatga tashrif buyurishi kutilayotgandi. Sportchining qat’iyatiga havas qilsa arziydi: go‘zal qo‘shiqchi bilan tanishish uchun qo‘lidan kelgan hamma narsani qildi.

Shakiraning o‘zi ham uni chempionat oxiriga kelibgina ko‘rdi. Pike o‘zining bo‘lajak sevgilisiga uning uchun finalga chiqishiga va’da berdi. Shunday bo‘ldi ham: uchrashuvdan keyin sevishganlar bir zumga ham ajralmadi. Matbuot juftlikni romantik uchrashuvlarida qo‘lga tushirishga harakat qildi, ammo Shakira ham, Jerar ham munosabatlari haqida gapirishga shoshilmadi. Gap shundaki, ular tanishganida ikkalasining ham hayotida boshqa birov bor edi.

Shakira Argentina sobiq prezidentining o‘g‘li Antonio De la Rua bilan 11 yildan beri gaplashar, Pike esa aktrisa Nuriya Tomas bilan 1 yildan buyon ishqiy munosabatda bo‘lgan. Ammo Shakira va Pike bir-birlariga bo‘lgan his-tuyg‘ulariga qarshi bora olmadi va bir yillik tanishuvdan so‘ng o‘rtalaridagi munosabatlarini ommaga e’lon qilishdi. Shundan keyingina sevishganlar har qadamini poylaydigan paparatssilardan yashirinishni to‘xtatdi, aksincha bir-birlariga bo‘lgan otashin muhabbatlarini barchaga ko‘z-ko‘z qilishdi.

Shakira sevgan insoni uchun hatto katalon tilini o‘rganishni va uning ishtirokidagi barcha futbol matchlarida ishtirok etishni boshladi. Jerar ham Shakiraning konsertlariga bajonidil borar, hatto shunday vaqtlar bo‘lganki, uni musiqiy karyerasini tashlamaslikka ham ko‘ndira olgan.

Mashhur juftlik karyeradan tortib oilaviy mas’uliyatgacha bo‘lgan hamma narsada bir-birlarini so‘zsiz qo‘llab-quvvatladilar. 2012-yilda ularning birinchi farzandi Milan, 2015-yilda esa ikkinchi o‘g‘li Sasha dunyoga keldi. Shakira bu yillar davomida Jerarga qoyil qolishdan to‘xtamas, uni dunyodagi eng yaxshi ota deb bilardi. Juftlikka barchaning havasi kelardi.

Biroq Shakira va Jerar munosabatlarini qonuniylashtirishga shoshilishmasdi. Gap-so‘zlarga qaraganda, aynan xonanda nikohdan o‘tishni iloji boricha kechiktirishga harakat qilgan.

Shakira “rafiqa” maqomiga ega bo‘lishni xohlamasligini, munosabatlarida nikohdan so‘ng yo‘qolishi mumkin bo‘lgan ma’lum bir ehtirosni saqlab qolish muhimligini bir necha bor aytib o‘tgan. Shunga qaramay, qo‘shiqchining o‘zi agar kim bilandir turmush qurmoqchi bo‘lsa, u inson orzusidagi erkak — aynan Jerar bo‘lishini ham alohida ta’kidlagandi.