Shavkat Mirziyoyev 8-iyun kuni suv omborlarini modernizatsiya qilish hamda Surxondaryo viloyatida ichimlik suvi ta’minotini yaxshilash loyihalariga oid taqdimot bilan tanishdi. Bu haqda Prezident matbuot xizmati xabar qildi.
Qayd etilishicha, 2017-yilda prezident farmoni bilan “O‘zbekgidroenergo” aksiyadorlik jamiyati tashkil etilgan. O‘tgan yili yana 4 ta suv ombori ushbu jamiyat boshqaruviga o‘tkazilgan va ular 6 taga yetgan. Xorijiy kompaniyalarni jalb etgan holda har bir suv omborining texnik holati o‘rganib chiqilgan va kechiktirib bo‘lmaydigan ta’mirlash tadbirlari belgilangan. Unga muvofiq, to‘g‘onlar, suv olish va chiqarish inshootlari ta’mirlanmoqda, nasos agregatlari tiklanmoqda.
Taqdimotda ushbu ishlar va oldindagi vazifalar haqida axborot berilgan. Davlat rahbari barcha suv omborlarini modernizatsiya qilish orqali xavfsizligini oshirish, gidromexanik uskunalar va o‘lchov qurilmalarini yangilab, tizimni raqamlashtirish bo‘yicha ko‘rsatmalar bergan. Bu orqali hamma ish jarayoni aksiyadorlik jamiyatining situatsion-tahlil markaziga onlayn ulanadi hamda yiliga qo‘shimcha 120 million kilovatt soat elektr ishlab chiqarish imkoniyati yaratiladi.
Bundan tashqari, Hisorak va Ohangaron suv omborlarida yillik 22 million kilovatt soat quvvatli 2 ta yangi kichik GES quriladi. Kosmik tadqiqotlar va texnologiyalar agentligiga suv omborlari holatini monitoring qilib, kosmik surat va ma’lumotlar bilan ta’minlash topshirilgan. Kichik gidroelektr stansiyalari qurilishiga xususiy sektorni jalb qilish, oliy ma’lumotli va o‘rta bo‘g‘in mutaxassislarini tayyorlash vazifalari ham ko‘rsatib o‘tilgan.
Ta’kidlanishicha, Surxondaryo aholisining atigi 58 foizi markazlashgan ichimlik suvi bilan ta’minlangan, xolos. Viloyatning janubiy tumanlari va Termiz shahrida suv mineralizatsiyasi miqdori yuqori. Shu bois prezident o‘tgan yili To‘palang suv omboridan tarmoq tortish tashabbusini ilgari surgan. Bugungacha 47 kilometr quvur tortilib, ichimlik suvi Sariosiyo markazigacha olib borilgan. Yil yakunigacha Denov va Sho‘rchi tumanlariga yetkazish rejalashtirilgan.
Loyihaga ko‘ra, bir kecha-kunduzda 200 ming kub metr suv tozalash inshooti, qariyb 400 kilometr magistral quvur tortiladi. Natijada hudud aholisini toza ichimlik suvi bilan ta’minlash 90 foizga yetadi. Davlat rahbari buning uchun tuman va mahallalar ichidagi quvurlarni ham tiklash, yangi tarmoqlar qurish va sifatli xizmatni yo‘lga qo‘yish zarurligini ta’kidlagan.
Izoh (0)