Шавкат Мирзиёев 8 июнь куни сув омборларини модернизация қилиш ҳамда Сурхондарё вилоятида ичимлик суви таъминотини яхшилаш лойиҳаларига оид тақдимот билан танишди. Бу ҳақда Президент матбуот хизмати хабар қилди.
Қайд этилишича, 2017 йилда президент фармони билан «Ўзбекгидроэнерго» акциядорлик жамияти ташкил этилган. Ўтган йили яна 4 та сув омбори ушбу жамият бошқарувига ўтказилган ва улар 6 тага етган. Хорижий компанияларни жалб этган ҳолда ҳар бир сув омборининг техник ҳолати ўрганиб чиқилган ва кечиктириб бўлмайдиган таъмирлаш тадбирлари белгиланган. Унга мувофиқ, тўғонлар, сув олиш ва чиқариш иншоотлари таъмирланмоқда, насос агрегатлари тикланмоқда.
Тақдимотда ушбу ишлар ва олдиндаги вазифалар ҳақида ахборот берилган. Давлат раҳбари барча сув омборларини модернизация қилиш орқали хавфсизлигини ошириш, гидромеханик ускуналар ва ўлчов қурилмаларини янгилаб, тизимни рақамлаштириш бўйича кўрсатмалар берган. Бу орқали ҳамма иш жараёни акциядорлик жамиятининг ситуацион-таҳлил марказига онлайн уланади ҳамда йилига қўшимча 120 миллион киловатт соат электр ишлаб чиқариш имконияти яратилади.
Бундан ташқари, Ҳисорак ва Оҳангарон сув омборларида йиллик 22 миллион киловатт соат қувватли 2 та янги кичик ГЭС қурилади. Космик тадқиқотлар ва технологиялар агентлигига сув омборлари ҳолатини мониторинг қилиб, космик сурат ва маълумотлар билан таъминлаш топширилган. Кичик гидроэлектр станциялари қурилишига хусусий секторни жалб қилиш, олий маълумотли ва ўрта бўғин мутахассисларини тайёрлаш вазифалари ҳам кўрсатиб ўтилган.
Таъкидланишича, Сурхондарё аҳолисининг атиги 58 фоизи марказлашган ичимлик суви билан таъминланган, холос. Вилоятнинг жанубий туманлари ва Термиз шаҳрида сув минерализацияси миқдори юқори. Шу боис президент ўтган йили Тўпаланг сув омборидан тармоқ тортиш ташаббусини илгари сурган. Бугунгача 47 километр қувур тортилиб, ичимлик суви Сариосиё марказигача олиб борилган. Йил якунигача Денов ва Шўрчи туманларига етказиш режалаштирилган.
Лойиҳага кўра, бир кеча-кундузда 200 минг куб метр сув тозалаш иншооти, қарийб 400 километр магистрал қувур тортилади. Натижада ҳудуд аҳолисини тоза ичимлик суви билан таъминлаш 90 фоизга етади. Давлат раҳбари бунинг учун туман ва маҳаллалар ичидаги қувурларни ҳам тиклаш, янги тармоқлар қуриш ва сифатли хизматни йўлга қўйиш зарурлигини таъкидлаган.
Изоҳ (0)