Shavkat Mirziyoyev 8-iyun kuni O‘zbekistonda tashrif bilan bo‘lib turgan Birlashgan Millatlar Tashkiloti bosh kotibining birinchi o‘rinbosari Amina Muhammad bilan uchrashuv o‘tkazdi. Bu haqda Prezident matbuot xizmati xabar qildi.
Qayd etilishicha, jahonning bosh xalqaro tashkiloti delegatsiyasi tarkibida uchrashuvda BMT Yevropa iqtisodiy komissiyasi rahbari Olga Algayerova va BMT Taraqqiyot dasturining O‘zbekistondagi doimiy koordinatori Roli Astxana ham ishtirok etgan. Mamlakatda barqaror rivojlanish maqsadlarini amalga oshirish doirasida BMTning institut va markazlari bilan ko‘p qirrali va samarali hamkorlikni kengaytirishning dolzarb masalalari ko‘rib chiqilgan.
Delegatsiya rahbari O‘zbekiston yetakchisiga tashkilot bosh kotibi Antoniu Guterrishning salomi va ezgu tilaklarini yetkazgan. Ta’kidlanganidek, BMT O‘zbekiston tomonidan amalga oshirilayotgan ochiq va pragmatik siyosatni, shuningdek, 2030-yilga qadar barqaror taraqqiyot sohasidagi global kun tartibining asosiy vazifalar dasturini yuqori baholagan.
Uchrashuvda faol muloqot va almashinuvlarni davom ettirish, O‘zbekistonda barqaror rivojlanishning, eng avvalo, aholi turmush sifatini yaxshilash va farovonligini yuksaltirishga qaratilgan asosiy maqsadlari ijrosini ta’minlash uchun hamkorlikni mustahkamlash va qo‘shma tadbirlarni amalga oshirishga alohida e’tibor qaratilgan. Kambag‘allikni qisqartirish, oziq-ovqat xavfsizligini ta’minlash, sog‘liqni saqlash va ta’lim sohalarida keng ko‘lamli islohotlarni ilgari surish, gender tenglik bo‘yicha milliy strategiyani amalga oshirish, “yashil” energetikani jadal rivojlantirish, innovatsiyalar va raqamli texnologiyalarni joriy qilish, infratuzilmani modernizatsiya qilish va boshqa masalalar yana bir bor sheriklikning ustuvor sohalari sifatida qayd etilgan. Xalqaro siyosat masalalari va mintaqaviy muammolar yuzasidan ham fikr almashilgan.
BMT Bosh kotibining birinchi o‘rinbosari Amina Muhammad Markaziy Osiyo mamlakatlari mintaqada do‘stlik, yaxshi qo‘shnichilik, ishonch va sheriklik munosabatlarini mustahkamlashda ulkan muvaffaqiyatlarga erishganini katta mamnuniyat bilan qayd etgan. O‘zbekistonning Afg‘onistonda bardavom tinchlikni ta’minlashga hamda ushbu mamlakatning ijtimoiy-iqtisodiy tiklanishiga, shu jumladan yirik transport va energetika loyihalarini ilgari surish orqali ko‘maklashish borasidagi sa’y-harakatlarini qo‘llab-quvvatlagan.
Muzokaralar yakunida O‘zbekiston Respublikasining Birlashgan Millatlar Tashkiloti institut va tuzilmalari bilan keng ko‘lamli hamkorligini qabul qilingan “yo‘l xarita”lari asosida rivojlantirish bo‘yicha qo‘shma chora-tadbirlar majmuini amalga oshirish yuzasidan kelishuvga erishilgan.
Izoh (0)