Yangi tadqiqotga ko‘ra, Gonkong ketma-ket ikkinchi yil ekspat sifatida yashash uchun dunyodagi eng qimmat shahar bo‘ldi. Bu haqda Bloomberg xabar berdi.
Ekspat — o‘z davlatidan tashqarida yashovchi mutaxassis. Mehnat migranti va muhojirdan farqi — yuqori malakaga egaligi. Odatda ekspatlar Sharq davlatlarda yashovchi g‘arblik fuqarolar bo‘ladi.
Joriy yilning mart oyida o‘z tadqiqotini o‘tkazgan ECA International ma’lumotlariga ko‘ra, o‘tgan yil davomida qimmatlashgan narxlar va kuchli valyuta Gonkongni eng qimmat shaharga aylantirdi.
Reytingdagi kuchli beshlikni London va Tokio yakunlaydi.
London va Nyu-York birinchi beshlikdan joy olishiga ijara narxining o‘sishi sabab bo‘lgan. Bu shaharlarda ijara narxi mos ravishda 20 va 12 foizga oshgan.
Yashash narxi bo‘yicha hisobotda ijara, benzin va kommunal xizmatlarning sezilarli o‘sishiga qaramay, Singapur 13-o‘rinda qoldi.
ECA ma’lumotlariga ko‘ra, bular so‘rov davrining so‘nggida Singapur dollarining boshqa mintaqaviy valyutalarga nisbatan zaiflashishi bilan qoplangan.
Yaponiya shaharlarining barchasi yen kursi pasaygani sabab ro‘yxatda pastga tushdi, Xitoy shaharlari Shanxay va Guanchjou esa “kuchli” yuan sabab mos ravishda 8 va 9-o‘rinlarni egalladi.
Reytingga ko‘ra, barcha shaharlarda benzin narxi o‘tgan yilga nisbatan o‘rtacha 37 foizga oshgan bo‘lsa, Bayrutda 1128 foizga oshgan.
Tehronda yoqilg‘i narxi eng arzon bo‘lib, bir litr benzin atigi 0,09 dollar turadi.
Bir chashka qahva 5,21 dollar, litri benzin 3,04 dollar va bir kilogramm pomidor 11,51 dollar ekani Gonkongni birinchi o‘ringa olib chiqdi.
O‘tgan yili Gonkongga global inflyatsiyaning o‘sishi boshqa mintaqaviy va global hududlarga qaraganda kamroq ta’sir ko‘rsatgan bo‘lsa-da, u dunyodagi eng qimmat shahar bo‘lib qolmoqda, — dedi ECA International’ning Osiyo bo‘yicha mintaqaviy direktori Li Kuan.O‘tgan yili AQSH dollariga bog‘langan Gonkong dollarining kuchliligi unga boshqa valyutalar zaiflashgan paytda dunyodagi eng qimmat joy sifatida o‘z mavqeyini saqlab qolishga imkon berdi.
ECA International butun dunyo bo‘ylab 490 dan ortiq joylarda iste’mol tovarlari va xizmatlari narxini tahlil qiladi.
Shu bilan birga turar joy haqidagi ma’lumotlar ham hisobga olinadi, odatda dunyo bo‘ylab 410 dan ortiq joylarda chet ellik xodimlar yashaydigan hududlarda ijara narxini taqqoslanadi.
Oxirgi hisobotda 120 ta davlatning 207 ta shahri o‘rin olgan.
2022-yilda ekspatlar uchun dunyodagi eng qimmat 20 ta joy (qavslar ichida 2021-yildagi reyting keltirilgan):
- Gonkong, Xitoy (1)
- Nyu-York, AQSH (4)
- Jeneva, Shveysariya (3)
- London, Buyuk Britaniya (5)
- Tokio, Yaponiya (2)
- Tel-Aviv, Isroil (7)
- Syurix, Shveysariya (6)
- Shanxay, Xitoy (9)
- Guanchjou, Xitoy (10)
- Seul, Janubiy Koreya (8)
- San-Fransisko, AQSH (15)
- Shenchjen, Xitoy (12)
- Singapur (13)
- Pekin, Xitoy (16)
- Quddus, Isroil (18)
- Bern, Shveysariya (17)
- Yokogama, Yaponiya (11)
- Kopengagen, Daniya (14)
- Oslo, Norvegiya (19)
- Taypey, Tayvan (21)
Izoh (0)