Янги тадқиқотга кўра, Гонконг кетма-кет иккинчи йил экспат сифатида яшаш учун дунёдаги энг қиммат шаҳар бўлди. Бу ҳақда Bloomberg хабар берди.
Экспат — ўз давлатидан ташқарида яшовчи мутахассис. Меҳнат мигранти ва муҳожирдан фарқи — юқори малакага эгалиги. Одатда экспатлар Шарқ давлатларда яшовчи ғарблик фуқаролар бўлади.
Жорий йилнинг март ойида ўз тадқиқотини ўтказган ECA International маълумотларига кўра, ўтган йил давомида қимматлашган нархлар ва кучли валюта Гонконгни энг қиммат шаҳарга айлантирди.
Рейтингдаги кучли бешликни Лондон ва Токио якунлайди.
Лондон ва Нью-Йорк биринчи бешликдан жой олишига ижара нархининг ўсиши сабаб бўлган. Бу шаҳарларда ижара нархи мос равишда 20 ва 12 фоизга ошган.
Яшаш нархи бўйича ҳисоботда ижара, бензин ва коммунал хизматларнинг сезиларли ўсишига қарамай, Сингапур 13-ўринда қолди.
ECА маълумотларига кўра, булар сўров даврининг сўнггида Сингапур долларининг бошқа минтақавий валюталарга нисбатан заифлашиши билан қопланган.
Япония шаҳарларининг барчаси ен курси пасайгани сабаб рўйхатда пастга тушди, Хитой шаҳарлари Шанхай ва Гуанчжоу эса «кучли» юань сабаб мос равишда 8 ва 9-ўринларни эгаллади.
Рейтингга кўра, барча шаҳарларда бензин нархи ўтган йилга нисбатан ўртача 37 фоизга ошган бўлса, Байрутда 1128 фоизга ошган.
Теҳронда ёқилғи нархи энг арзон бўлиб, бир литр бензин атиги 0,09 доллар туради.
Бир чашка қаҳва 5,21 доллар, литри бензин 3,04 доллар ва бир килограмм помидор 11,51 доллар экани Гонконгни биринчи ўринга олиб чиқди.
Ўтган йили Гонконгга глобал инфляциянинг ўсиши бошқа минтақавий ва глобал ҳудудларга қараганда камроқ таъсир кўрсатган бўлса-да, у дунёдаги энг қиммат шаҳар бўлиб қолмоқда, — деди ECA International’нинг Осиё бўйича минтақавий директори Ли Куан.Ўтган йили АҚШ долларига боғланган Гонконг долларининг кучлилиги унга бошқа валюталар заифлашган пайтда дунёдаги энг қиммат жой сифатида ўз мавқейини сақлаб қолишга имкон берди.
ECA International бутун дунё бўйлаб 490 дан ортиқ жойларда истеъмол товарлари ва хизматлари нархини таҳлил қилади.
Шу билан бирга турар жой ҳақидаги маълумотлар ҳам ҳисобга олинади, одатда дунё бўйлаб 410 дан ортиқ жойларда чет эллик ходимлар яшайдиган ҳудудларда ижара нархини таққосланади.
Охирги ҳисоботда 120 та давлатнинг 207 та шаҳри ўрин олган.
2022 йилда экспатлар учун дунёдаги энг қиммат 20 та жой (қавслар ичида 2021 йилдаги рейтинг келтирилган):
- Гонконг, Хитой (1)
- Нью-Йорк, АҚШ (4)
- Женева, Швейцария (3)
- Лондон, Буюк Британия (5)
- Токио, Япония (2)
- Тель-Авив, Исроил (7)
- Цюрих, Швейцария (6)
- Шанхай, Хитой (9)
- Гуанчжоу, Хитой (10)
- Сеул, Жанубий Корея (8)
- Сан-Франциско, АҚШ (15)
- Шэньчжэнь, Хитой (12)
- Сингапур (13)
- Пекин, Хитой (16)
- Қуддус, Исроил (18)
- Берн, Швейцария (17)
- Йокогама, Япония (11)
- Копенгаген, Дания (14)
- Осло, Норвегия (19)
- Тайпей, Тайван (21)
Изоҳ (0)