2022-yilning yanvar oyida Farg‘ona viloyatining shahar va tumanlaridagi 1055 ta mahallada tadbirkorlikni rivojlantirish, aholi bandligini ta’minlash va kambag‘allikni qisqartirish masalalari bo‘yicha hokim yordamchilari rasman lavozimga tayinlangandi. Viloyatida faoliyati qoniqarsiz deb topilgan 38 nafar hokim yordamchisi o‘z arizasiga ko‘ra, yana ikki nafari esa sud qarori asosida ishdan bo‘shatildi. Bu haqda Farg‘ona viloyati hokimligi matbuot xizmati xabar berdi.
Aprel oyida hokim yordamchilari 3 oylik faoliyatining dastlabki natijalari tahlil qilinganda hududida yangi tadbirkorlik faoliyatini yo‘lga qo‘ygan, kichik sanoat va servis loyihalarini ishga tushirgan, oilaviy tadbirkorlik loyihalarini amalga oshirishga ko‘maklashgan 400 ga yaqin hokim yordamchilari bilan birga ishida natija ko‘rinmagan, mahallasida ishsizlik ko‘rsatkichi yuqori bo‘lgan 200 dan ziyod hokim yordamchilari ham borligi ma’lum bo‘lgan.
Viloyatda eng yaxshi natija ko‘rsatgan Bag‘dod tumani “Chekxitoy” MFYdagi hokim yordamchisi Nurmatjon G‘oziyev prezident tomonidan ajratilgan sovg‘a MacBook Pro bilan ijobiy natijaga erishgan 342 nafar hokim yordamchilari esa Iqtisodiy taraqqiyot va kambag‘allikni qisqartirish vazirligining tashakkurnomalari bilan taqdirlangan.
Shu bilan birga, viloyatda faoliyati “qoniqarsiz” deb topilgan jami 205 nafar hokim yordamchilarining bilim va ko‘nikmalarini oshirish uchun 28—29-aprel kunlari “Hokim yordamchilari faoliyatini samarali tashkil qilish, mahallada tadbirkorlikni rivojlantirish, aholi bandligini ta’minlash va kambag‘allikni qisqartirish yo‘llari” mavzusida ikki kunlik malaka oshirish seminari tashkil etilgan.
“Ushbu hokim yordamchilarining katta qismi seminarga taklif etilgan oliy ta’lim muassasalari o‘qituvchilari, mutaxassislar tomonidan o‘z faoliyatlarini samarali tashkil qilish bo‘yicha berilgan zarur tavsiya va yo‘riqnomalarni yaxshi o‘zlashtirib, ish faoliyatlarini yangidan tashkil qilgan bo‘lishsa-da, lekin o‘nlab mahallalarda ijobiy o‘zgarish qayd etilmadi”, — deyiladi xabarda.
Ushbu tahlillardan kelib chiqib, viloyat shahar va tumanlari bo‘yicha faoliyati qoniqarsiz deb topilgan jami 38 nafar hokim yordamchilari o‘z arizasiga asosan vazifasidan ozod qilindi. Shuningdek, ikki nafar hokim yordamchisi bilan tuzilgan mehnat shartnomasi sud qarorlariga asosan bekor qilindi.
Izoh (0)