“Sirdaryo hududiy elektr tarmoqlari” korxonasining ikki nafar xodimi pora olayotgan vaqtida qo‘lga tushdi. Bu haqda DXX matbuot xizmati “Daryo”ga ma’lum qildi.
Ma’lum qilinishicha, “Sirdaryo hududiy elektr tarmoqlari” AJning ikki nafar xodimi mahalliy MCHJga qarashli Guliston tumani hududidan o‘tuvchi Sirdaryo o‘zanidan qum-shag‘al karyeriga elektr energiyasi ulab berishni va’da qilgan. Ular 1,6 ming kilovatt kuchlanishga ega bo‘lgan elektr transformatori, 100 dona beton simyog‘och, 17,5 kilometr masofaga yetadigan yuqori kuchlanishli elektr simlari va boshqa ehtiyot qismlarni tegishli tartibda rasmiylashtirmasdan, “Sirdaryo hududiy elektr tarmoqlari” korxonasi hisobidan chiqarib berish hamda sohaga tegishli idoradan ushbu ulanadigan elektr tarmog‘iga texnik shartlarda qayd etilgan talab asosida ijobiy xulosa olib berish evaziga MCHJ rahbaridan 510 million so‘m va 5 ming dollar talab qilgan.
DXX Sirdaryo viloyati bo‘yicha boshqarmasi tomonidan viloyati IIB xodimlari hamkorligida o‘tkazilgan tezkor tadbirda dastlab “Sirdaryo hududiy elektr tarmoqlari” korxonasining Davlat va shartnomaviy xizmatlar ko‘rsatish hamda rivojlantirish xizmati xodimi oldindan 300 million so‘m hamda 5 ming dollarni olgan vaqtida ushlangan.
So‘nggi tezkor tadbir davom ettirilib, u 5 ming dollarni jinoiy sherigi — korxonaning Mustahkamlik va xavfsizlik texnikasi xizmati xodimiga bergan vaqtida u ham ashyoviy dalillar bilan qo‘lga olingan.
Hozirda holat yuzasidan Jinoyat kodeksining 168 (firibgarlik) va 211-moddalari (pora berish) bilan jinoyat ishi qo‘zg‘atilib, tergov harakatlari olib borilmoqda.
Avvalroq “Yunusobod tumangaz” bo‘limining muhandisi tadbirkordan pora olayotganda qo‘lga tushgani, Davlat kadastrlari palatasi Nurobod tuman filiali mutaxassislari 2 mln so‘m pora bilan ushlangani, Sirdaryoda tadbirkorning elektrdan 5 mln so‘m qarzini “yo‘q qilib” bermoqchi bo‘lgan elektr tarmoqlari korxonasi muhandisi qo‘lga olingani to‘g‘risida xabar berilgandi.
Izoh (0)