Shavkat Mirziyoyev 3-iyun kuni tongda, Urganch shahriga jo‘nab ketishdan avval Yevropada xavfsizlik va hamkorlik tashkilotining amaldagi raisi, Polsha tashqi ishlar vaziri Zbignev Rauni qabul qildi.
Prezident matbuot xizmatining xabar berishicha, O‘zbekiston va YXHT o‘rtasidagi ko‘p qirrali hamkorlikni yanada rivojlantirish, O‘zbekiston—Polsha munosabatlarini kengaytirish masalalari hamda dolzarb xalqaro kun tartibi ko‘rib chiqildi.
Keyingi yillarda YXHT bilan sheriklikda sifat jihatidan yangi darajaga erishilgani katta mamnuniyat bilan qayd etildi. YXHT raisi Yangi O‘zbekistonda amalga oshirilayotgan ortga qaytmas islohotlar strategiyasi berayotgan natijalarni hamda mamlakatning pragmatik tashqi siyosati, eng avvalo Markaziy Osiyoda do‘stlik, yaxshi qo‘shnichilik va ishonch munosabatlarini mustahkamlash borasidagi sa’y-harakatlarini yuqori baholadi.
O‘zbekiston va ushbu xalqaro tuzilmaning barcha institutlari o‘rtasidagi amaliy hamkorlikni kuchaytirish, demokratik yangilanishlarni, shu jumladan, konstitutsiyaviy islohotni ekspertlik jihatdan qo‘llab-quvvatlashni kengaytirish, tashkilotning Parlament assambleyasi doirasidagi hamkorlikni mustahkamlash ustuvor ahamiyatga ega ekani qayd etildi.
Shuningdek, “Yashil” taraqqiyot, raqamlashtirish, ish o‘rinlarini yaratish va tadbirkorlik tashabbuslarini qo‘llab-quvvatlash orqali kambag‘allikni qisqartirish, tabiatni muhofaza qilish bo‘yicha, shu jumladan Orolbo‘yi mintaqasida muhim tadbirlarni amalga oshirishga alohida e’tibor qaratilgan.
Xalqaro siyosat, jumladan, Yevropa ittifoqi bilan ko‘p tomonlama munosabatlarni rivojlantirish, Afg‘onistonda tinchlikni ta’minlash va uning ijtimoiy-iqtisodiy tiklanishiga ko‘maklashish masalalari yuzasidan ham fikr almashilgan.
Shavkat Mirziyoyev O‘zbekiston—Polsha amaliy hamkorligini kengaytirish istiqbollariga alohida to‘xtalgan. Xususan, qayd etilishicha, o‘tgan yili ikki tomonlama tovar ayirboshlash uchdan bir qismga, joriy yil boshidan esa qariyb 50 foizga ko‘paydi. Polshaning yetakchi kompaniyalari bilan birgalikda qishloq xo‘jaligi, oziq-ovqat, kimyo, elektrotexnika va boshqa tarmoqlarda qator qo‘shma loyihalar amalga oshirilmoqda. Muhim gumanitar dasturlar amalga oshirilmoqda, jumladan, yurtimizda Varshava menejment universitetining filiali o‘z ishini boshladi.
Uchrashuvda ishbilarmon doiralar o‘rtasida to‘g‘ridan to‘g‘ri aloqalarni yo‘lga qo‘yish, madaniy-gumanitar almashinuvni faollashtirish muhimligi alohida ta’kidlandi.
Janob Zbignev Rauning O‘zbekistonga tashrifi yakunlari bo‘yicha qo‘shma “yo‘l xaritasi”ni qabul qilishga kelishib olindi.
YXHT amaldagi raisi, Polsha tashqi ishlar vaziri Zbignev Rau O‘zbekistonga 2-iyun kuni tashrif buyurgandi. U 4-iyungacha tashqi ishlar vaziri v. b. Vladimir Norov, Senat va Qonunchilik palatasi rahbarlari Tanzila Norboyeva va Nurdinjon Ismoilov ham bilan uchrashadi.
Izoh (0)