“Davlat korxonalariga raqobatni cheklovchi to‘g‘ridan to‘g‘ri imtiyozlar berish taqiqlanmoqda” — adliya vaziri o‘rinbosari

Jamoatchilik muhokamasiga qo‘yilgan Tadbirkorlik kodeksi loyihasida davlat korxonalariga raqobatni cheklovchi to‘g‘ridan to‘g‘ri soliq, bojxona va boshqa turdagi imtiyoz hamda preferensiyalar berish taqiqlanmoqda. Bu haqda 2-iyun kuni AOKAda bo‘lib o‘tgan matbuot anjumanida adliya vaziri o‘rinbosari Alisher Karimov ma’lum qildi, deya xabar bermoqda “Daryo” muxbiri.

Alisher Karimovning aytishicha, shu paytgacha davlat korxonalariga boshqa raqobatchilarga nisbatan ko‘proq imtiyoz berilishi noroziliklarga sabab bo‘lib kelgan.

“Tadbirkorlik subyektlarida monopoliyani cheklashga qaratilgan masala mazkur kodeksda alohida norma sifatida belgilanmoqda. Davlat organlari davlat korxonalariga nisbatan qanaqadir imtiyozlar yoki preferensiyalar berishi, ya’ni boshqa subyektlarga nisbatan ularga ko‘proq e’tibor qaratishi ko‘plab e’tirozlarga sabab bo‘lib keladi. Kodeks loyihasida davlat korxonalariga raqobatni cheklovchi to‘g‘ridan to‘g‘ri soliq, bojxona va boshqa turdagi imtiyoz hamda preferensiyalar berish taqiqlanmoqda”, – dedi vazir o‘rinbosari.

Alisher Karimovning ta’kidlashicha, loyihada tadbirkorlikni qo‘llab-quvvatlash bo‘yicha davlat subsidiyalarini joriy etish tartiblari ham belgilanmoqda.

“Subsidiya prezident qarori bilan joriy etiladi, tartib-taomillari hukumat tomonidan belgilanadi. Subsidiyalarning asosiy yo‘nalishlari belgilanadi va ular “yagona darcha” prinsipi asosida Yagona interaktiv davlat xizmatlari portali orqali ajratiladi. Yevropa tiklanish va taraqqiyot banki, Osiyo taraqqiyot bankining takliflari va xalqaro standartlarga muvofiq ayollar va yoshlar tadbirkorligi hamda ularni qo‘llab-quvvatlash tizimi (alohida dasturlar asosida) joriy etilmoqda. Ijtimoiy tadbirkorlik, ijtimoiy korxona, aholining ijtimoiy ehtiyojmand qatlamlari ro‘yxati va ularni, jumladan nogironligi bo‘lgan shaxslarni qo‘llab-quvvatlashning mexanizmlari belgilanmoqda”, – dedi vazirlik rasmiysi.

Matbuot anjumanida adliya vaziri o‘rinbosari ayni paytda kodeks loyihasini takomillashtirish bo‘yicha tadbirkorlardan takliflar berishlarini so‘radi. Vazirlikda maxsus ishchi guruh tuzilgan bo‘lib, har bir taklif atroflicha o‘rganib chiqilishi va inobatga olinishi aytildi.

Avvalroq Adliya vazirligi tomonidan Tadbirkorlik kodeksi loyihasi ishlab chiqilgani va jamoatchilik muhokamasiga qo‘yilgani haqida xabar qilingandi.