Жамоатчилик муҳокамасига қўйилган Тадбиркорлик кодекси лойиҳасида давлат корхоналарига рақобатни чекловчи тўғридан-тўғри солиқ, божхона ва бошқа турдаги имтиёз ҳамда преференциялар бериш тақиқланмоқда. Бу ҳақда 2 июнь куни АОКАда бўлиб ўтган матбуот анжуманида адлия вазири ўринбосари Алишер Каримов маълум қилди, дея хабар бермоқда «Дарё» мухбири.
Алишер Каримовнинг айтишича, шу пайтгача давлат корхоналарига бошқа рақобатчиларга нисбатан кўпроқ имтиёз берилиши норозиликларга сабаб бўлиб келган.
«Тадбиркорлик субъектларида монополияни чеклашга қаратилган масала мазкур кодексда алоҳида норма сифатида белгиланмоқда. Давлат органлари давлат корхоналарига нисбатан қанақадир имтиёзлар ёки преференциялар бериши, яъни бошқа субъектларга нисбатан уларга кўпроқ эътибор қаратиши кўплаб эътирозларга сабаб бўлиб келади. Кодекс лойиҳасида давлат корхоналарига рақобатни чекловчи тўғридан-тўғри солиқ, божхона ва бошқа турдаги имтиёз ҳамда преференциялар бериш тақиқланмоқда», – деди вазир ўринбосари.
Алишер Каримовнинг таъкидлашича, лойиҳада тадбиркорликни қўллаб-қувватлаш бўйича давлат субсидияларини жорий этиш тартиблари ҳам белгиланмоқда.
«Субсидия президент қарори билан жорий этилади, тартиб-таомиллари ҳукумат томонидан белгиланади. Субсидияларнинг асосий йўналишлари белгиланади ва улар «ягона дарча» принципи асосида Ягона интерактив давлат хизматлари портали орқали ажратилади. Европа тикланиш ва тараққиёт банки, Осиё тараққиёт банкининг таклифлари ва халқаро стандартларга мувофиқ аёллар ва ёшлар тадбиркорлиги ҳамда уларни қўллаб-қувватлаш тизими (алоҳида дастурлар асосида) жорий этилмоқда. Ижтимоий тадбиркорлик, ижтимоий корхона, аҳолининг ижтимоий эҳтиёжманд қатламлари рўйхати ва уларни, жумладан ногиронлиги бўлган шахсларни қўллаб-қувватлашнинг механизмлари белгиланмоқда», – деди вазирлик расмийси.
Матбуот анжуманида адлия вазири ўринбосари айни пайтда кодекс лойиҳасини такомиллаштириш бўйича тадбиркорлардан таклифлар беришларини сўради. Вазирликда махсус ишчи гуруҳ тузилган бўлиб, ҳар бир таклиф атрофлича ўрганиб чиқилиши ва инобатга олиниши айтилди.
Аввалроқ Адлия вазирлиги томонидан Тадбиркорлик кодекси лойиҳаси ишлаб чиқилгани ва жамоатчилик муҳокамасига қўйилгани ҳақида хабар қилинганди.
Изоҳ (0)