Rossiyada 2022-yilning aprel oyida 19,9 ming dona avtomobil ishlab chiqarilgan. Bu ko‘rsatkich o‘tgan yilning shu davriga nisbatan 85,4 foizga kamdir. Bu haqida Rosstat xabar berdi.
2021-yil aprel oyida qat’iy kovid cheklovlari amal qilgan va ko‘plab zavodlar ishlamay qolgan edi. Keyin mamlakatda 136 mingga yaqin avtomobil ishlab chiqarilgan.
Aprel oyidagi ishlab chiqarish ko‘rsatkichi mart oyiga nisbatan 53,1 foizga kam. Joriy yilning dastlabki to‘rt oyida ishlab chiqarishni davom ettirayotgan Rossiya avtomobil zavodlari 264 ming dona yengil avtomobil ishlab chiqardi, bu 2021-yilga nisbatan 47,4 foizga kam.
Rossiyada yuk mashinalari ishlab chiqarish ham kamaydi. Jumladan, o‘tgan oyda 12,3 mingta og‘ir yuk avtomobillari yig‘ildi, bu 2021-yilning apreliga nisbatan 30,4 foizga, 2022-yilning martiga nisbatan 13,2 foizga kamdir.
2022-yil mart oyi boshida bir qator yirik xorijiy avtomobil ishlab chiqaruvchilari Rossiyadagi faoliyatini vaqtinchalik to‘xtatganini e’lon qildi.
Shunday qilib, kompaniyalar Rossiya zavodlarida avtomobil ishlab chiqarishni va mahalliy dilerlarga yangi avtomobillarni yetkazib berishni to‘xtatdi. Bu qaror dunyodagi murakkab geosiyosiy vaziyat va ta’minot zanjirlarining nosozligi bilan izohlandi.
Aprel oyida Rossiya avtomobil bozori ham antirekordni yangiladi. Yangi avtomobillar sotuvi 78,5 foizga kamayib, atigi 32 702 donani tashkil etdi.
Bu O‘zbekistonga qanday ta’sir qiladi?
Rossiya ko‘p yillardan beri O‘zbekistondagi asosiy avtomobil importchilaridan biri bo‘lib kelgan.Masalan, 2021-yilda Rossiya O‘zbekistonga 4 539 dona avtomobil import qilib, eng yirik importchilar uchligiga kirgan.
Ammo Ukraindagi urush boshlangandan keyin Rossiyada avtomobil zavodlarining faoliyati to‘xtab qola boshladi.
Buning natijasida O‘zbekiston Rossiyadan mashina sotib olishni keskin kamaytirdi — agar o‘tgan oylarda mamlakatdan uch yuz dona avtomobil olib kelingan bo‘lsa, aprel oyida bu ko‘rsatkich bor-yog‘i 107 ta bo‘lgan.
Ilgari Rossiya O‘zbekistonga olib kiriladigan avtomobillar soni bo‘yicha Xitoy va Janubiy Koreyadan keyin uchinchi o‘rinda bo‘lgan bo‘lsa, hozir bu o‘rinni Qozog‘istonga boy berib qo‘ydi.
2020-yili “Uzavtosanoat” va “Volkswagen Group Rus” Volkswagen va Škoda avtomobillarining yig‘uvini yo‘lga qo‘ygan edi.
2021-yildan beri Jizzax viloyatida Lada Vesta SW, XRAY va Largus avtomobillari yig‘iladi.
Bu loyihalar ham urush tufayli so‘roq ostida qoldi.
Izoh (0)