Tojikiston prezidenti Emomali Rahmonning O‘zbekistonga tashrifi doirasida 2-iyun kuni Zarafshon daryosida Yavan gidroelektr stansiyasi qurilishini boshlash marosimi bo‘lib o‘tdi. Bu haqda Prezident matbuot xizmati xabar qildi.
Qayd etilishicha, Shavkat Mirziyoyev va Emomali Rahmon ramziy tugmani bosib, qurilishga start bergan.
Ushbu inshoot energetika sohasidagi ikki tomonlama hamkorlikda birinchi yirik loyiha bo‘ladi. 140 megavatt quvvatli zamonaviy stansiya mamlakatlar energetik xavfsizligi, suv va qishloq xo‘jaligi barqarorligini ta’minlashda muhim o‘rin tutadi. Muhandislik ishlari to‘liq zamonaviy standartlar asosida, ilg‘or xorijiy kompaniyalar ishtirokida olib borilmoqda.
Loyihani moliyalashtirishga yetakchi xalqaro institutlar, shu jumladan, Osiyo taraqqiyot banki hamda Yevropa tiklanish va taraqqiyot banki qiziqish bildirgan. Ushbu loyiha tarmoqning ilmiy va ishlab chiqarish salohiyatini mustahkamlash, minglab xonadonlar va yangi korxonalarini “yashil” energiya bilan ta’minlashga xizmat qiladi.
31-may kuni Shavkat Mirziyoyevning taklifiga binoan Tojikiston prezidenti Emomali Rahmon joriy yil 2—3-iyun kunlari rasmiy tashrif bilan O‘zbekistonda bo‘lishi haqida xabar berildi.
Emomali Rahmon 2-iyun kuni ertalab Toshkentga yetib keldi. U yo‘lovchi reyslarini bajaruvchi samolyotdan foydalangan. “Sputnik Tojikiston”ning qayd etishicha, Tojikiston rahbari budjet pullarini iqtisod qilish uchun shaxsiy samolyot sotib olishni istamagan.
Toshkent xalqaro aeroportida uni prezident Shavkat Mirziyoyev kutib olgan. Yetakchilar o‘rtasida qisqa suhbat bo‘lib o‘tgan. So‘ng Ko‘ksaroyda Emomali Rahmonni rasmiy kutib olish marosimi bo‘lib o‘tgan. Marosimda ikki mamlakat rasmiy delegatsiyalari a’zolari ham ishtirok etgan.
Bundan tashqari, davlat rahbarlari o‘rtasida tor doirada uchrashuv bo‘lib o‘tdi. Muzokalarda Markaziy Osiyoda tinchlik va barqarorlikni ta’minlash masalalari muhokama qilindi. Muzokaralar ikki mamlakat delegatsiyalari ishtirokida kengaytirilgan tarkibda davom etdi. Prezidentlar fan, ta’lim, san’at, kino va turizm sohalaridagi hamkorlikka e’tibor qaratish zarurligini ta’kidladi.
Izoh (0)