Shavkat Mirziyoyev va Tojikiston prezidenti Emomali Rahmonning muzokaralari 2-iyun kuni ikki mamlakat delegatsiyalari ishtirokida kengaytirilgan tarkibda davom etdi. Bu haqda Prezident matbuot xizmati xabar qildi.
Qayd etilishicha, O‘zbekiston rahbari ko‘p qirrali hamkorlikning barcha yo‘nalishlarida muvaffaqiyatlarga erishilganini qayd etgan. Tojikiston O‘zbekistonning ishonchli strategik sherigimiz ekanini ta’kidlagan. Prezident o‘zaro manfaatli va har tomonlama hamkorlikni mustahkamlashga tayyorligini bildirgan.
Kuni kecha o‘tgan hukumatlararo komissiya yig‘ilishi va biznes forumda 1 milliard dollarlik yangi bitim va shartnomalar imzolangani qayd etilgan. Transport, hududlararo hamkorlik, parlamentlararo va madaniy-gumanitar aloqalar borasida ham muhim natijalarga erishilgan.
Ikki davlat poytaxtlari Toshkent va Dushanbe shaharlari, Surxondaryo va Xatlon viloyatlari hamda Toshkent, Farg‘ona, Samarqand va So‘g‘d viloyatlari o‘rtasida samarali aloqalar yo‘lga qo‘yilgan. Mazkur tashrif doirasida hamkorlik bo‘yicha “yo‘l xaritasi”ni Jizzax va So‘g‘d viloyatlari ham qabul qiladi.
Prezidentlar mamlakatlar o‘rtasidagi iqtisodiy sheriklik ustuvor ahamiyatga ega ekanini, savdo hajmi va nomenklaturasini karrasiga oshirish uchun katta salohiyat mavjudligini ta’kidlagan. Mashinasozlik, elektrotexnika, to‘qimachilik, charm, farmatsevtika, oziq-ovqat, agrosanoat, tog‘-kon, metallurgiya va boshqa tarmoqlarda loyihalarni amalga oshirish uchun imkoniyatlar borligi ko‘rsatilgan.
O‘zbekiston-Tojikiston investitsiya kompaniyasi salohiyatini faol ishga solish orqali hududlararo va sanoat kooperatsiyasi loyihalarini amalga oshirish dolzarbligi ko‘rsatib o‘tilgan. Madaniy-gumanitar hamkorlikni mustahkamlash to‘g‘risida kelishuvlarga erishilgan. Prezidentlar fan, ta’lim, san’at, kino va turizm sohalaridagi hamkorlikka e’tibor qaratish zarurligini ta’kidlagan. Yoshlarning intellektual salohiyatini rivojlantirish va ma’naviyatini yuksaltirish ustuvor yo‘nalish sifatida qayd etilgan.
31-may kuni Shavkat Mirziyoyevning taklifiga binoan Tojikiston prezidenti Emomali Rahmon joriy yil 2—3-iyun kunlari rasmiy tashrif bilan O‘zbekistonda bo‘lishi haqida xabar berildi.
Emomali Rahmon 2-iyun kuni ertalab Toshkentga yetib keldi. U yo‘lovchi reyslarini bajaruvchi samolyotdan foydalangan. “Sputnik Tojikiston”ning qayd etishicha, Tojikiston rahbari budjet pullarini iqtisod qilish uchun shaxsiy samolyot sotib olishni istamagan.
Toshkent xalqaro aeroportida uni prezident Shavkat Mirziyoyev kutib olgan. Yetakchilar o‘rtasida qisqa suhbat bo‘lib o‘tgan. So‘ng Ko‘ksaroyda Emomali Rahmonni rasmiy kutib olish marosimi bo‘lib o‘tgan. Marosimda ikki mamlakat rasmiy delegatsiyalari a’zolari ham ishtirok etgan.
Bundan tashqari, davlat rahbarlari o‘rtasida tor doirada uchrashuv bo‘lib o‘tdi. Muzokalarda Markaziy Osiyoda tinchlik va barqarorlikni ta’minlash masalalari muhokama qilindi.
Izoh (0)