Germaniya tez orada Yevropaning NATOga a’zo mamlakatlari orasida eng katta armiyaga ega davlat bo‘ladi. Bu haqda Germaniya kansleri Olaf Shols Neue Berliner, shuningdek, Stuttgarter Zeitung va Stuttgarter Nachrichten gazetalari tahririyatiga bergan intervyusida gapirdi.
“Germaniya yaqinda NATO doirasida Yevropadagi eng yirik muntazam armiyaga ega bo‘ladi”, — dedi Shols hamda bu Germaniya va uning ittifoqchilari xavfsizligini sezilarli darajada mustahkamlashini ta’kidladi.
Bundan tashqari, Germaniya kansleri nemis rasmiylarining Ukrainaga harbiy yordam ko‘rsatmayotgani haqida ham mamlakat ichidan, tashqarisidan bildirilgan tanqidlardan ajablanayotganini aytdi. Uning so‘zlariga ko‘ra, Berlin Kiyevga qurol topshirgan va yanada ko‘proq yetkazib berishni rejalashtirmoqda. “Ushbu buyurtmalar bajarilmoqda”, — deb qo‘shimcha qildi Shols og‘ir qurollarni jo‘natish haqidagi kelishuvga ishora qilib.
Sholsning ta’kidlashicha, “bundesverdda shunchaki berib yuborsa bo‘ladigan foydalanishga tayyor texnikalarning katta zaxiralari yo‘q”. Uning so‘zlariga ko‘ra, bunga boshqarmaning “2010-yildan beri tarkibiy jihatdan yetarlicha moliyalashtirilmagani” sabab bo‘lgan va bu mamlakat mudofaa qobiliyatini cheklab qo‘ygan.
Avvalroq Ukraina Germaniyani tanqid qilgandi. Ukrainaning Germaniyadagi elchisi Andrey Melnik Germaniya qurol-yarog‘ yetkazib berish masalasida “Ukrainani tushkunlikka solayotganini” aytgan. Die Welt hujjatlarga tayanib, 30-martdan 26-maygacha Germaniya hukumatidan Ukrainaga bor-yo‘g‘i ikkita qurol-yarog‘ jo‘natilgani, biroq ularda faqat kichik jihozlar bo‘lganini xabar qildi.
142 ta davlatning harbiy kuchlari bo‘yicha tahliliy ma’lumotlarni taqdim etuvchi Global Firepower portali ma’lumotlariga ko‘ra, fevral oyi boshida NATOga a’zo Yevropa davlatlari orasida faol xizmatdagi harbiy xizmatchilar soni bo‘yicha Fransiya 205 ming kishi bilan yetakchi edi.
Germaniya esa harbiy xizmatchilar soni bo‘yicha Yevropada ikkinchi o‘rinda turadi: mamlakat armiyasida 185 ming kishi xizmat qiladi. 29-may kuni Germaniyaning hukmron koalitsiyasi bundesver uchun 100 milliard yevro miqdorida maxsus jamg‘arma tashkil etishning huquqiy shakli bo‘yicha kelishib oldi. Bu mablag‘lar mamlakat armiyasini moliyalashtirishga yo‘naltirilishi kerak.
Izoh (0)