Ukrainada 24-fevral kuni urush boshlanganidan buyon 4074 nafar tinch aholi halok bo‘ldi, 4826 nafari yaralandi. Bu haqda BMT Inson huquqlari bo‘yicha Oliy komissari boshqarmasining yangilangan ma’lumotlarida aytilgan. Qurbonlar orasida 262 nafar bola bor.
Donetsk va Lugansk viloyatlarida 2307 nafar tinch aholi halok bo‘lgan, yana 2730 nafari yaralangan. Shulardan viloyatlarning DXR va LXR nazoratidagi hududlarida 136 kishi halok bo‘lgan, 569 kishi jarohatlangan. Ukraina hukumati nazoratidagi hududlarida esa 2171 kishi halok bo‘lgan va 2161 kishi yaralangan.
Ukrainaning boshqa hududlarida urush qurbonlari 1767 kishini, turli darajada jarohat olganlar 2096 kishini tashkil qilmoqda.
“Tinch aholi orasida ma’lum bo‘lgan o‘limlarning aksariyati keng ko‘lamli vayronagarchiliklarga sabab bo‘lgan portlovchi qurollardan foydalanish, jumladan, og‘ir artilleriya va baravar o‘t ochish tizimlaridan o‘qqa tutishlar, raketa va aviazarbalar oqibatida sodir bo‘lgan”, — deyiladi xabarda.
BMT Oliy komissari boshqarmasi tinch aholi orasidagi yo‘qotishlar aslida bundan ko‘proq, deb hisoblaydi, chunki janglar davom etayotgan hududlardan ma’lumot olish qiyin. Hisobotga kiritilmagan ba’zi ma’lumotlar hali tasdiqlanishini kutmoqda.
BMT tomonidan taqdim etilgan raqamlar harbiylar orasidagi qurbonlarni o‘z ichiga olmaydi. Ukraina prezidenti Vladimir Zelenskiy 16-aprel kuni urush davomida ko‘rilgan harbiy yo‘qotishlar 2,5 mingdan 3 ming kishigacha ekanini, yana 10 ming kishi jarohatlanganini aytgan edi. Rossiya Mudofaa vazirligi o‘sha sanada Ukraina tomonining yo‘qotishlarini 23 367 kishiga baholagan.
Rossiya Mudofaa vazirligi harbiylar orasidagi talafotlar haqida oxirgi marta 25-mart kuni xabar bergan. O‘sha paytda e’lon qilingan ma’lumotlarga ko‘ra, Ukrainadagi jangovar harakatlarda 1351 nafar rossiyalik harbiy halok bo‘lgan, 3825 nafari yaralangan.
Izoh (0)