Germaniya sobiq prezidenti Gauk Ukrainaga qurol yetkazib berishni qo‘llab-quvvatladi

Germaniya sobiq prezidenti (2012—2017-yillarda) Yoaxim Gauk Ukrainaning mudofaa salohiyatini kuchaytirish uchun hozir unga qurol yetkazib berish zarur, deb hisoblaydi.

“Jahon urushida qatnashgan ittifoqchilarning qurollari bo‘lmaganida, Yevropa hozir natsistlar hukmronligi ostida bo‘lardi. Ammo bu tarixiy misolsiz ham biz hozirgi vaziyatda birinchi navbatda so‘zni Ukrainaga berishimiz kerakligi kundek ravshan”, — dedi Gauk Bild gazetasiga bergan intervyusida.

“Agar odamlar bizga ‘Erkinligimiz uchun kurashmoqchimiz, hatto hayotimizni xavf ostiga qo‘yamiz’, desa, xavfsiz joyda turib olib ularga nima to‘g‘riligini tushuntirish bizning ishimiz emas”, — dedi Gauk va bu “befarqlik hamda takabburlikning eng yuqori darajasi” bo‘lishini qo‘shmcha qildi.

Shu bilan birga, Gauk siyosatchilar Rossiya prezidenti Vladimir Putin bilan muzokaralarni davom ettirishi kerakligini ta’kidladi. “Biz diplomatiyadan hech qachon voz kechmasligimiz kerak. Biroq muzokaralar o‘ziga ishonch, shuningdek, kuch pozitsiyasidan olib borilishi zarur”, — dedi Germaniyaning sobiq prezidenti. “Sovuq urush davrida bu to‘g‘ri yechim bo‘lgan”, — deya so‘zini yakunladi u.

Avvalroq Bild gazetasi Germaniya hukumati va Germaniya federal kansleri idorasi Ukrainaga Marder piyodalarga mo‘ljallangan jangovar mashinalarini yetkazib berishga to‘sqinlik qilayotgani haqida xabar bergandi. Nashr ma’lumotlariga ko‘ra, asosiy ahamiyatga ega vazirlarni o‘z ichiga olgan Federal xavfsizlik kengashi bir oydan beri Rheinmetall konserni tomonidan ishlab chiqarilgan 100 tagacha “Marder”ni eksport qilish bo‘yicha qaror qabul qilmayapti. Rheinmetall’ning Ukrainaga qurol yuborish to‘g‘risidagi arizasi 22-apreldan beri ko‘rib chiqilmoqda. Berlin Ukrainaga va’da qilgan Gepard o‘ziyurar zenit qurollarini Kiyevga yetkazib berish Germaniya tomoni haligacha ular uchun mos miqdordagi snaryadlarni xarid qila olmagani sababli to‘xtagan, deb xabar bergandi Die Welt nashri Ukraina hukumatidagi manbalarga tayanib.

Rossiya 24-fevraldan beri Ukrainada “harbiy maxsus operatsiya” o‘tkazmoqda. G‘arb davlatlari, jumladan, AQSH va Buyuk Britaniya Kiyevga qurol yetkazib berishni boshlagan.

Fevral oyida Germaniya kansleri Olaf Shols mamlakat Ukrainaga qurol yetkazib bermasligini aytgandi. Aprel boshida esa Rheinmetall konserni Ukrainaga 50 ta “Leopard 1” eski tanklarini yetkazib berishga qaror qilgan. 27-aprel kuni esa Germaniya birinchi marta Ukrainaga og‘ir qurollar yetkazib berishi haqida e’lon qilindi.