Шольц Германия армиясини Европадаги энг йирик армияга айлантиришни ваъда қилди

Германия тез орада Европанинг НАТОга аъзо мамлакатлари орасида энг катта армияга эга давлат бўлади. Бу ҳақда Германия канцлери Олаф Шольц Neue Berliner, шунингдек, Stuttgarter Zeitung ва Stuttgarter Nachrichten газеталари таҳририятига берган интервьюсида гапирди.

«Германия яқинда НАТО доирасида Европадаги энг йирик мунтазам армияга эга бўлади», — деди Шольц ҳамда бу Германия ва унинг иттифоқчилари хавфсизлигини сезиларли даражада мустаҳкамлашини таъкидлади.

Бундан ташқари, Германия канцлери немис расмийларининг Украинага ҳарбий ёрдам кўрсатмаётгани ҳақида ҳам мамлакат ичидан, ташқарисидан билдирилган танқидлардан ажабланаётганини айтди. Унинг сўзларига кўра, Берлин Киевга қурол топширган ва янада кўпроқ етказиб беришни режалаштирмоқда. «Ушбу буюртмалар бажарилмоқда», — деб қўшимча қилди Шольц оғир қуролларни жўнатиш ҳақидаги келишувга ишора қилиб.

Шольцнинг таъкидлашича, «бундесвердда шунчаки бериб юборса бўладиган фойдаланишга тайёр техникаларнинг катта захиралари йўқ». Унинг сўзларига кўра, бунга бошқарманинг «2010 йилдан бери таркибий жиҳатдан етарлича молиялаштирилмагани» сабаб бўлган ва бу мамлакат мудофаа қобилиятини чеклаб қўйган.

Аввалроқ Украина Германияни танқид қилганди. Украинанинг Германиядаги элчиси Андрей Мелник Германия қурол-яроғ етказиб бериш масаласида «Украинани тушкунликка солаётганини» айтган. Die Welt ҳужжатларга таяниб, 30 мартдан 26 майгача Германия ҳукуматидан Украинага бор-йўғи иккита қурол-яроғ жўнатилгани, бироқ уларда фақат кичик жиҳозлар бўлганини хабар қилди.

142 та давлатнинг ҳарбий кучлари бўйича таҳлилий маълумотларни тақдим этувчи Global Firepower портали маълумотларига кўра, февраль ойи бошида НАТОга аъзо Европа давлатлари орасида фаол хизматдаги ҳарбий хизматчилар сони бўйича Франция 205 минг киши билан етакчи эди.

Германия эса ҳарбий хизматчилар сони бўйича Европада иккинчи ўринда туради: мамлакат армиясида 185 минг киши хизмат қилади. 29 май куни Германиянинг ҳукмрон коалицияси бундесвер учун 100 миллиард евро миқдорида махсус жамғарма ташкил этишнинг ҳуқуқий шакли бўйича келишиб олди. Бу маблағлар мамлакат армиясини молиялаштиришга йўналтирилиши керак.