Rossiya Tashqi ishlar vazirligi hozircha do‘st bo‘lmagan mamlakatlarda joylashgan diplomatik muassasalarini evakuatsiya qilish zaruriyatini ko‘rmayapti, biroq bunday holat uchun tayyorlab qo‘yilgan reja bor, bu haqda vazir o‘rinbosari Yevgeniy Ivanov ma’lum qildi, deb yozadi “RBK”.
Uning so‘zlariga ko‘ra, “rusofobiya unsurlarining yuqori faolligi” qayd etilayotgan mamlakatlarda hukumat elchixonalarni himoya qilish bo‘yicha choralar ko‘rmoqda. Lekin hamma joyda ham bunday bo‘lgani yo‘q, dedi diplomat.
“Shunga qaramay, do‘st bo‘lmagan mamlakatlardan Rossiya xorijiy muassasalari xodimlarining bir qismini evakuatsiya qilish zaruriyatini ushbu bosqichda ko‘rib chiqmayapmiz. Ammo voqealarning nomaqbul tarzda rivojlanishi holati mo‘ljallangan bunday choralar ko‘zda tutilgan”, — dedi u.
Mart oyi boshida tasdiqlangan dushman mamlakatlar ro‘yxatiga qariyb 50 ta davlat kiradi, bular Yevroittifoqning barcha mamlakatlari, Avstraliya, Kanada, Yangi Zelandiya, Singapur, AQSH, Ukraina, Chernogoriya, Shveysariya, Yaponiya va boshqalar.
Rossiya avvalroq Ukrainadan o‘z diplomatik missiyalarini evakuatsiya qilish bo‘yicha tadbirlar olib borgan edi. Bunday qaror qabul qilingani haqida TIV 22-fevral kuni kechqurun — Ukrainada operatsiyalar boshlanishidan qariyb 2 kun avval ma’lum qilgan. Rossiya TIV ushbu qarorni Ukrainadagi diplomatlarga 2014-yildan beri tajovuzkor harakatlar sodir etilgani va ularning hayoti xavf ostida qolayotgani bilan izohlagan.
Ukrainada harbiy operatsiya olib borilayotgan bir paytda Rossiya elchixonalariga hujum holatlari ko‘paydi. G‘arb mamlakatlari Rossiyaga qarshi sanksiyalarning bir nechta paketini kiritishga ulgurdi. Kreml G‘arbning harakatlarini urush deb hisoblaydi. Prezident “dushmanlarcha xatti-harakat”larga yo‘l qo‘ygan mamlakatlar va yuridik shaxslarga qarshi javob sanksiyalari joriy qilishni buyurdi.
Izoh (0)