Россия Ташқи ишлар вазирлиги ҳозирча дўст бўлмаган мамлакатларда жойлашган дипломатик муассасаларини эвакуация қилиш заруриятини кўрмаяпти, бироқ бундай ҳолат учун тайёрлаб қўйилган режа бор, бу ҳақда вазир ўринбосари Евгений Иванов маълум қилди, деб ёзади «РБК».
Унинг сўзларига кўра, «русофобия унсурларининг юқори фаоллиги» қайд этилаётган мамлакатларда ҳукумат элчихоналарни ҳимоя қилиш бўйича чоралар кўрмоқда. Лекин ҳамма жойда ҳам бундай бўлгани йўқ, деди дипломат.
«Шунга қарамай, дўст бўлмаган мамлакатлардан Россия хорижий муассасалари ходимларининг бир қисмини эвакуация қилиш заруриятини ушбу босқичда кўриб чиқмаяпмиз. Аммо воқеаларнинг номақбул тарзда ривожланиши ҳолати мўлжалланган бундай чоралар кўзда тутилган», — деди у.
Март ойи бошида тасдиқланган душман мамлакатлар рўйхатига қарийб 50 та давлат киради, булар Евроиттифоқнинг барча мамлакатлари, Австралия, Канада, Янги Зеландия, Сингапур, АҚШ, Украина, Черногория, Швейцария, Япония ва бошқалар.
Россия аввалроқ Украинадан ўз дипломатик миссияларини эвакуация қилиш бўйича тадбирлар олиб борган эди. Бундай қарор қабул қилингани ҳақида ТИВ 22 февраль куни кечқурун — Украинада операциялар бошланишидан қарийб 2 кун аввал маълум қилган. Россия ТИВ ушбу қарорни Украинадаги дипломатларга 2014 йилдан бери тажовузкор ҳаракатлар содир этилгани ва уларнинг ҳаёти хавф остида қолаётгани билан изоҳлаган.
Украинада ҳарбий операция олиб борилаётган бир пайтда Россия элчихоналарига ҳужум ҳолатлари кўпайди. Ғарб мамлакатлари Россияга қарши санкцияларнинг бир нечта пакетини киритишга улгурди. Кремль Ғарбнинг ҳаракатларини уруш деб ҳисоблайди. Президент «душманларча хатти-ҳаракат»ларга йўл қўйган мамлакатлар ва юридик шахсларга қарши жавоб санкциялари жорий қилишни буюрди.
Изоҳ (0)