AQSh o‘z elchixonasini qo‘riqlash uchun Kiyevga maxsus bo‘linmalarini yuborishi mumkin

Pentagon va Davlat departamenti Amerika elchixonasini himoya qilish uchun Kiyevga AQSh maxsus bo‘linmalari harbiy xizmatchilarini yuborish masalasini muhokama qilmoqda. Bu haqda The Wall Street Journal o‘z manbalariga tayanib xabar berdi.

Agar shunday qaror qabul qilinsa, maxsus topshiriqli bo‘linma faqat diplomatlarni qo‘riqlash bilan shug‘ullanadi, deyiladi xabarda.

Bundan tashqari, Amerika hukumati Ukrainada dengiz piyodalari bo‘lib turishi amaliyotini qayta tiklash variantlarini ko‘rib chiqmoqda, ular qoidaga ko‘ra, AQShning butun dunyo bo‘ylab diplomatik vakolatxonalarini qo‘riqlaydi.

AQShning Ukrainadagi elchixonasi 18-may kuni uch oylik tanaffusdan keyin o‘z faoliyatini qayta boshlagan edi. Ayni paytda diplomatik missiya vakili Deniyel Langenkamp konsullik faoliyati darhol tiklanmasligini, chunki Davlat departamentining safarlarni taqiqlash haqidagi tavsiyalari butun Ukraina bo‘ylab hamon amal qilayotganini aytgandi.

Rossiyaning Ukrainadagi harbiy operatsiyasi boshlanishidan o‘n kun avval — 14-fevral kuni AQSh Ukrainadagi elchixonasini Kiyevdan Lvovga vaqtinchalik ko‘chirishga qaror qilgandi. AQSh davlat kotibi Entoni Blinken ushbu qaror diplomatik vakolatxona xodimlari xavfsizligi yuzasidan qabul qilinganini aytgandi. 22-fevral kuni elchixona Polshaga ko‘chgani ma’lum bo‘ldi.