O‘zbekistonda birjada birinchi marta un bo‘yicha ochiq savdo bo‘lib o‘tdi

Joriy yil 1-iyunda O‘zbekiston tovar-xomashyo birjasida un mahsuloti bo‘yicha dastlabki ochiq birja savdolari o‘tkazildi.

Xususan, “O‘zdonmahsulot” tarkibidagi 44 ta korxonalar tomonidan birja savdolariga 10 ming tonna 1-navli un qo‘yildi va ulardan 8,3 ming tonnasi, ya’ni 83 foizi sotildi. 

Birja savdolarida sotilmagan qoldiq unning hajmi qariyb 1,7 ming tonnani tashkil etdi. Ya’ni birjaning un bozorida taklif yetarli darajada bo‘ldi.

O‘tkazilgan birja savdo yakunlariga ko‘ra 1-navli unning o‘rtacha narxi mahsulotning bir tonnasi uchun 4,5 mln so‘mni tashkil qildi. 

Birjada un bo‘yicha shakllangan kotirovka uning boshlang‘ich narxiga (4,2 mln so‘m) nisbatan 6 foizga o‘sdi.

Un bo‘yicha o‘tkazilgan birja savdolarida jami 2 822 ta xaridor ishtirok etgan bo‘lib, ulardan 56 tasi Toshkent non ishlab chiqaruvchi korxonalar hisoblanadi. Ushbu korxonalar birjada jami 874 tonna 1-navli un sotib oldi.

Avvalroq Toshkentda “buxanka” narxi 2 800 so‘mga chiqqani haqida xabar berilgan edi.