Самарқанд шаҳрининг Фарҳод қўрғонидаги тўйхонада 26 май куни бўлиб ўтган тўйдан сўнг оммавий заҳарланиш содир бўлди. Бу ҳақда «Дарё» мухбири Фарҳод Норбўтаев хабар бермоқда.
Маълум бўлишича, 2022 йилнинг 26 май куни Фарҳод қўрғонидаги тўйхонада бўлган тўйда вилоятнинг Жомбой тумани «Олмазор» маҳалласида яшовчи фуқаролар иштирок этган. Улар тўй таомларидан истеъмол қилгач, соғлиғи ёмонлашиб, туман тиббиёт бирлашмасининг юқумли касалликлар бўлимига мурожаат қилган.Жомбой тумани ҳокимлиги ахборот хизмати раҳбари Орифжон Одиловнинг «Дарё»га маълум қилишича, овқатдан заҳарланиш кузатилган ресторан Жомбой туманида эмас.
«Туманимиз ҳудудида овқатдан заҳарланиш билан боғлиқ ҳолат юз бергани ҳақида хабарлар тарқалмоқда. Жумладан, Мilliy ҳамда MY5 телеканали журналистлари томонидан тўй маросимида иштирок этган 196 нафар шахсда хасталик аломатлари кузатилгани хабар қилинди. Ҳақиқатан ҳам ‘Олмазор’ маҳалласида истиқомат қилувчи айрим юртдошларимиз қорин оғриғи ҳамда кўнгил айниши билан тиббиёт муассасаларига мурожаат қилган. Аммо хабарларда қайд этилганидек, беморлар сони 200 нафар эмас. Шунингдек, ҳолатга алоқадорлиги гумон қилинаётган базмгоҳ Самарқанд шаҳрида жойлашганини қайд этиш жоиз», — дейди Орифжон Одилов.
Туман тиббиёт бирлашмасидан маълум қилинишича, 28—31 май кунлари юқумли касалликлар бўлимига 13 нафар бемор ётқизилган. Шунингдек, умумий ҳолати енгил бўлган беш нафар бемор «Зарафшон» оилавий шифокорлик пунктида даволанмоқда. Патронаж ҳамширалар тўйда иштирок этган ҳар бир фуқаро хонадонида бўлиб, уларнинг саломатлигини назоратга олган.
Орифжон Одиловнинг маълум қилишича, овқатдан заҳарланиш ташхиси қўйилганлар орасида оғир аҳволдаги беморлар ва болалар йўқ.
Изоҳ (0)