Rossiyaning marhum prezidenti Boris Yelsinning kuyovi Valentin Yumashyev Rossiya prezidenti Vladimir Putinning maslahatchisi lavozimini tark etdi, u mazkur lavozimda 22 yil ishlagan. Bu haqda Reuters ikki manbaga tayanib xabar berdi.
Agentlik Yumashyevning o‘zidan va Rossiya prezidenti matbuot kotibi Dmitriy Peskovdan izoh ola olmadi.
Yelsin markazi ijrochi direktorining o‘rinbosari Lyudmila Telen “RIA Novosti”ga ma’lum qilishicha, Yumashyev aprel oyida o‘z tashabbusi bilan lavozimini tark etgan.
“Yumashyev aprel oyidan beri prezident maslahatchisi emas... U ixtiyoriy asosda prezident maslahatchisi bo‘lib ishlagandi. Aprel oyida u o‘z xohishiga ko‘ra bu lavozimni tark etgan”, — deydi Telen.
1997—1998-yillarda Yumashyev Rossiya prezidenti Boris Yelsin ma’muriyatining rahbari lavozimida ishlagan. U Yelsinning qizi Tatyana bilan turmush qurgan.
Yumashyev Putinning ixtiyoriy asosda maslahatchisi ekani haqida 2018-yilda ma’lum bo‘lgandi. O‘shanda Peskov Yumashyev bu lavozimda 18 yildan beri ishlab kelayotganini aytgandi.
Avvalroq Rossiyaning BMT qoshidagi doimiy vakolatxonasi maslahatchisi Boris Bondaryev Rossiyaning Ukrainaga bostirib kirishiga norozilik belgisi sifatida iste’foga chiqqandi. Bondaryev qariyb 20 yil diplomat bo‘lib ishlagan edi.
Izoh (0)