Turkiya prezidenti Rajab Toyyib Erdo‘g‘on ukrainalik hamkasbi Vladimir Zelenskiy bilan suhbatlashdi va unga Rossiya—Ukraina muzokaralarida vositachilikni davom ettirishga va’da berdi, deb yozmoqda Anadolu.
Erdo‘g‘on bundan oldin ham Moskva va Kiyev o‘rtasidagi muzokara jarayonini davom ettirish uchun barcha sa’y-harakatlarini amalga oshirganini va kelajakda ham bu masalani qo‘llab-quvvatlashini ta’kidladi.
Bundan tashqari, Turkiya rahbari Ukrainadan dengiz orqali qishloq xo‘jaligi mahsulotlarini tashish uchun xavfsiz yo‘lak tashkil etish muhimligini qayd etdi. Erdo‘g‘on Turkiyaning Rossiya, Ukraina va BMT ishtirokida tuzilishi mumkin bo‘lgan boshqaruv markazi ishida ishtirok etishidan ham manfaatdor ekanini bildirdi. Davlat rahbari bunday markazni Istanbulda joylashtirilishiga ijobiy munosabatda ekanini aytdi.
Zelenskiyning Twitter’da yozishicha, suhbat chog‘ida “oziq-ovqat xavfsizligiga tahdid” va “Ukraina portlarini blokdan chiqarish yo‘llari” masalalari ko‘tarilgan, “xavfsizlik sohasida hamkorlik” mavzusi ham muhokama qilingan.
30-may kuni ertalab Erdo‘g‘on Rossiya prezidenti Vladimir Putin bilan muzokara o‘tkazgan edi. Turkiya rahbari Putinga Rossiya, Ukraina va BMT vakillarining Istanbulda uchrashuvini tashkil etishni taklif qilgan, shuningdek, harbiy harakatlarning salbiy oqibatlarini minimallashtirish va tomonlar o‘rtasida ishonchni mustahkamlash choralarini ko‘rishga chaqirgan.
Putin o‘z navbatida xavfsiz navigatsiyani ta’minlash hamda Qora va Azov dengizlarida minalar xavfini bartaraf etishga e’tibor qaratdi va Moskva Anqara bilan kelishilgan holda Ukraina portlaridan yuklar, jumladan, don tranzitini osonlashtirishga tayyorligini ma’lum qildi.
Bundan tashqari, Rossiya prezidenti sanksiyalar bekor qilinsagina Rossiya jahon bozoriga “katta hajmdagi o‘g‘itlar va qishloq xo‘jaligi mahsulotlarini” eksport qilishi mumkinligini tasdiqladi.
Mavzuga doir:
Izoh (0)