Aleksandr Lukashenko Ukrainadagi “maxsus operatsiya”da ishtirok etgan Belarus KGB (Davlat xavfsizligi qo‘mitasi) zobitlariga davlat mukofotlarini topshirdi, deb xabar bermoqda “Belta”.
“Ish grafigida navbatdagi tadbir — u ‘o‘ta maxfiy’ deb tasniflangan. Prezident bugun Ukraina hududidagi maxsus operatsiyasida ishtirok etgan KGB xodimlarini taqdirladi”, — deb yozadi prezidentga yaqin “Pervogo pul” Telegram-kanali.
Xabarda Ukrainadagi qaysi “maxsus operatsiya” haqida gap ketayotgani aytilmagan – Rossiyaning mamlakatga bosqini nazarda tutilyaptimi yoki bu Belarus maxsus xizmatlarining mustaqil operatsiyasimi, noma’lum.
Batafsil tafsilotlarni 31-may oqshomida “ONT” kanalidagi “Uyga yo‘llar” filmida namoyish etish va’da qilingan.
Eslatib o‘tamiz, G‘arb davlatlari Rossiyaning Ukrainadagi harbiy amaliyotini qo‘llab-quvvatlagani uchun Belarusga qarshi sanksiyalar kiritgandi. Lukashenko Belarus harbiylari Rossiyaning “maxsus operatsiyasida” qatnashmaganini ta’kidlagan.
Aprel oyi boshida esa Belarus prezidenti maxsus xizmatlar Ukrainada qo‘lga olingan belarusliklarni ozod qilish bo‘yicha maxsus operatsiya o‘tkazganini aytgandi.
Izoh (0)